Estonija padličyła straty ad savieckaj akupacyi
Kamisija pry Ministerstvie justycyi acaniła straty ad akupacyi Estonii Savieckim Sajuzam prykładna ŭ 1,2 miljarda jeŭra.
Kiraŭnik kamisii, historyk Toomas Chijo ličyć, što Estonija nie moža admovicca ad vyvučeńnia strat i patrabavańniaŭ kampiensacyi, tamu što heta budzie aznačać pryznańnie dobraachvotnaha dałučeńnia da SSSR.
Achviarami stalinskich represij stali 49 500 čałaviek, 24 100 čałaviek zahinuli padčas Druhoj suśvietnaj vajny, 139 400 čałaviek vymušanyja byli źjechać z Estonii. Estonija straciła Piačerski rajon i terytoryi za Narvaj. U spravazdačy havorycca, što čałaviečyja straty pa svajoj pryrodzie možna ličyć hienacydam.
U pieryjad z 1948 pa 1985 hod Estonija straciła miljon hiektaraŭ sielskahaspadarčych ziamiel.
U Estoniju zavieźli šmat pracoŭnaj siły, i dola estoncaŭ pamienšyłasia z 89% u 1941 hodzie da 61% u 1989 hodzie.
U spravazdačy taksama havorycca, što z-za akupacyi ŭzrovień žyćcia ŭ Estonii značna nižejšy za ŭzrovień žyćcia ŭ Finlandyi, a siaredniaja praciahłaść žyćcia na 3,5 hoda mienšaja.
Pavodle ministra justycyi Urmasa Rejnsału, mnohija straty niemahčyma vymierać hrašyma, naprykład, razbureńnie dziaržaŭnaści, kultury, adukacyi, raźvićcio svabodnaha hramadstva.