Novaja pravakacyja ad błohiera «Barmaleja»: jon pabiŭ ramianiom aktyvistaŭ la restarana «Pajedziem pajadzim» u Kurapatach VIDEA
Minčuk Alaksandr Kudłajeŭ, viadomy ŭ sacsietkach pad nikam «Barmalej», praciahvaje dziŭnyja «pierformansy». 17 kastryčnika jon pryjechaŭ u Kurapaty i kinuŭsia z ramianiom na aktyvistaŭ, jakija stajali ź bieł-čyrvona-biełymi ściahami pad restaranam «Pajedziem Pajadzim».
Padrabiaznaści raspavioŭ adzin z aktyvistaŭ Dzianis Urbanovič.
«Heta było ŭdzień, kala 14.30. Pryjechaŭ Kudłajeŭ na mašynie jak pasažyr, praŭda, kiroŭca śćviardžaŭ, što nie viedaje, kaho i navošta pryvioz.
Kudłajeŭ byŭ narmalna tak pjany. Vychapiŭ remień, pačaŭ razmachvać, udaryŭ paru razoŭ pa nazie adnamu z aktyvistaŭ. Kryčaŭ, abražaŭ bieła-čyrvona-bieły ściah.
Paśla Kudłajeŭ prakryčaŭ, što jon nibyta apłaciŭ aŭtobus sa spartoŭcami, jakija pryjeduć u Kurapaty źniščyć aktyvistaŭ. Zatym pajšoŭ u restaran, — kaža Urbanovič. —
My vyklikali milicyju, napisali zajavu. Milicyja našaje videa nie zachacieła brać. Kudłajeva ŭ restaranie apytali, ale nie zatrymlivali.
Jon vyjšaŭ trochi paźniej, jašče bolš pjany. Pry milicyi dasyłaŭ aktyvistam pavietranyja pacałunki, pakazvaŭ «faki». Kryčaŭ nam: «Budu stralać vas, budu bić». I źjechaŭ.
Milicyja paabiacała pravieści pravierku».
«Naša Niva» źviazałasia z Alaksandram Kudłajevym, kab pačuć jaho viersiju padziej i matyvy ŭčynku. Jon paprasiŭ pierazvanić jamu paźniej, paśla čaho pierastaŭ vychodzić na suviaź.
Nahadajem, što niadaŭna 45-hadovy Kudłajeŭ užo traplaŭ u naviny. Spačatku jon naviedaŭ «Pajedziem pajadzim», paśla čaho nie zrazumieła čamu pakazvaŭ «faki» kryžam u Kurapatach. A paśla vyśviatlaŭ adnosiny z ekanamistam Siarhiejem Čałym: Kudłajeŭ pryjechaŭ u bar na Zybickaj, dzie adpačyvaŭ Čały, i vyvaliŭ ekanamistu na hałavu pakiet kapusty.