Łukašenka pra apazycyju: Heta - zvyčajnyja kryminalniki
Kiraŭnik Biełarusi A.Łukašenka ŭ interviju ahienctvu France Press zajaviŭ, što siabravaŭ ź Biłam (naturalna, havorka pra Klintana) dy što budzie balatavacca na čaćvierty termin.
Kiraŭnik Biełarusi A.Łukašenka ŭ interviju ahienctvu France Press zajaviŭ, što pašyreńnie NATO sparadziła «mini-honku ŭzbrajeńniaŭ» u Eŭropie.
«My vielmi zakłapočanyja tym, što adbyvajecca na našych miežach. Samaloty NATO lotajuć la miažy našaj krainy. Čamu? My pačynajem uzmacniać našu procipavietranuju abaronu. Heta vyklikaje mini-honku ŭzbrajeńniaŭ».
«Čamu bałtyjskija krainy pavinny razhortvać siły chutkaha reahavańnia? Čamu? – zapytaŭsia Łukašenka, spasyłajučysia na členstva Łatvii, Litvy i Estonii ŭ Paŭnočna-atlantyčnym aljansie. –Vy prymušajecie nas reahavać adpaviedna i razhortvać siły dla specyjalnych aperacyjaŭ».
«Čamu NATO pašyrajuć i ŭzmacniajuć? Chutčej davajcie dumać, jak my možam demantavać hetuju vajennuju mašynu... Jana źjaŭlajecca absalutna niepatrebnaj», – skazaŭ kiraŭnik Biełarusi.
Łukašenka taksama skazaŭ, što Biełaruś planuje kupić rakiety «Iskander» u Rasiei, kab uzmacnić svaju pavietranuju abaronu.
Adkazvajučy na pytańnie pra palityčnych viaźniaŭ, Łukašenka skazaŭ, što pakolki niama palityčnych złačynstvaŭ, dyk niama i palityčnych viaźniaŭ. «Heta zvyčajnyja kryminalniki», — skazaŭ prezydent pra palityčnych apanentaŭ, jakich jon zvolniŭ z turmy ŭ hetym hodzie.
Havoračy pra aryšty maładych aktyvistaŭ, Łukašenka śćvierdziŭ, što dziasiatki ź ich źjaŭlajucca na demanstracyi pjanymi, tamu aryšty na 10-15 sutak patrebnyja, kab hetyja ludzi praćvierazieli i apamiatalisia.
Adkazvajučy na pytańnie pra mahčymaść svajoj adstaŭki, biełaruski prezydent zajaviŭ, što budzie balatavacca na nastupny prezydencki termin u 2011 hodzie.
Havoračy pra ciapierašni finansavy kryzis, biełaruski prezydent skazaŭ, što kryzis paćvierdziŭ bolšuju tryvałaść kiravanaj dziaržavaj biełaruskaj ekanomiki ŭ paraŭnańni ź inšymi ekanomikami. «Eŭrapiejcy štoraz bolš havorać pra biełaruskuju madel», — dadaŭ jon.
Kamentujučy čutki, što Hiłary Klintan moža stać dziaržaskratarom ZŠA, Łukašenka skazaŭ, što ŭ jaho byli ciopłyja adnosiny ź Biłam Klintanam, i što ŭ takim vypadku jon spadziajecca na paciapleńnie ŭ biełaruska-amerykanskich dačynieńniach.
«Ja dumaju, što na niejkim etapie ŭ nas atrymajucca salidnyja pieramovy. Ja raźličvaju na heta. Ja raźličvaju na Biła... Nam patrebny narmalny dyjaloh, i ja dumaju, što kali Bił skaža Hiłary pra heta, jana pasłuchaje — taksama tamu, što jon adyhraŭ vialikuju rolu ŭ vybarčaj kampanii demakrataŭ», — skazaŭ Łukašenka.
Ahułam Łukašenka adkazaŭ amal na 50 pytańniaŭ francuskich žurnalistaŭ. U interviju Łukašenka akcentavaŭ na «vielmi blizkich» dačynieńniach jaho krainy z Rasiejaj i vyśmiejvaŭ ich praciŭnikaŭ, ale adnačasova padkreśliŭ i važnaść lepšych dačynieńniaŭ Biełarusi z Eŭropaj.