U biudžecie Biełarusi niama hrošaj na vybary-2019. Ale heta ničoha nie značyć
U prajekcie biudžetu Biełarusi na 2019 hod nie zakładzienyja vydatki na praviadzieńnie vybaraŭ ci refierendumaŭ. Pra heta Jeŭraradyjo raspaviała staršynia CVK Lidzija Jarmošyna.
«Sapraŭdy, u nas pa hrafiku nastupny hod nie źjaŭlajecca vybarnym, tamu Ministerstva finansaŭ paličyła, što nie maje prava ŭklučać niejkija srodki na praviadzieńnie vybarčaj kampanii. Na nastupny hod praduhledžanyja tolki srodki na ŭtrymańnie Centralnaj vybarčaj kamisii».
Ciapier my viedajem, što ŭ «niavybarny» 2019 hod Centrvybarkam budzie kaštavać biełarusam 538 tysiač rubloŭ ($255 tysiač pa kursie Nacbanka na 26 kastryčnika). Heta pa 44 tysiačy ($21 tysiača) na miesiac.
U 2016 hodzie, kali ŭ Biełarusi vybirali deputataŭ Pałaty pradstaŭnikoŭ, vydatki na CVK byli ŭ 36 razoŭ bolšyja i składali 19,5 młn rubloŭ ($10 młn).
Ale ci možna pa adsutnaści hrošaj u biudžecie zrabić vysnovu, što parłamienckich ci prezidenckich vybaraŭ ci refierendumu ŭ 2019 hodzie nie budzie? Nie, śćviardžaje Lidzija Jarmošyna. Srodki na praviadzieńnie vybarčaj kampanii mohuć być vyłučanyja paśla pryznačeńnia vybaraŭ.
«Takoje mahčyma, ale miechanizm budzie bolš składany, — praciahvaje Lidzija Jarmošyna. — Pry pryznačeńni vybaraŭ treba budzie davać daručeńnie ŭradu, kab jon zrabiŭ adpaviednuju pastanovu i znajšoŭ hetyja srodki sa srodkaŭ dziaržaŭnych vydatkaŭ. Takoje mahčyma».