Milicyja dabiłasia, kab prahramu pa vyjaŭleńni dziciačaj parnahrafii pierakłali na biełaruskuju movu
MUS aktyŭna ŭkaraniaje prahramnaje zabieśpiačeńnie, raspracavanaje Centram pošuku źnikłych dziaciej i dziaciej, jakija niezakonna ekspłuatujucca, ZŠA, pryznačanaje dla zboru infarmacyi z fajłaabmiennych sietak z metaj vyjaŭleńnia asob, jakija raspaŭsiudžvajuć abo kalekcyjanujuć dziciačuju parnahrafiju.
Pra heta raspavioŭ Dźmitryj Cajun, načalnik adździeła pa supraćdziejańni miždziaržaŭnamu handlu ludźmi hałoŭnaha ŭpraŭleńnia pa narkakantroli i supraćdziejańni handlu ludźmi MUS, pieradaje sb.by: «Dadzienaja sistema dazvalaje vyznačać padazravanych, jakija raspaŭsiudžvajuć vyjavy z elemientami dziciačaj parnahrafii ŭ roznych fajłaabmiennych sietkach. Takim prahramnym praduktam karystajucca ŭ 77 krainach śvietu».
Pa chadajnictvie MUS ź niadaŭniaha času prahrama była pierakładzienaja na biełaruskuju movu.
«Našy zamiežnyja kalehi i raspracoŭščyki pajšli nam nasustrač, i, akramia troch moŭ, dadałasia jašče i biełaruskaja mova», — raspavioŭ Cajun. Pavodle jaho słoŭ, z dapamohaj prahramy MUS moža adsočvać usie ip-adrasy, dzie moža zachoŭvacca dziciačaja parnahrafija. Infarmacyja pradstaŭlena ŭ vyhladzie interaktyŭnaj karty, na jakoj bačnyja kropki na miascovaści, dzie, mahčyma, u dadzieny momant zajmajucca zapampoŭkaj abo raspaŭsiudžvańniem padobnaj infarmacyi.