Pamior Alaksij II

Abnoŭlena

5 śniežnia na 80‑ym hodzie žyćcia pamior patryjarch Maskoŭski i ŭsiaje Rusi Alaksij II. Jak paviedamlajuć rasiejskija ŚMI, patryjarch pamior u svajoj rezidencyi ŭ Pieradziełkinie.

5 śniežnia na 80‑ym hodzie žyćcia pamior patryjarch Maskoŭski i ŭsiaje Rusi Alaksij II. Jak paviedamlajuć rasiejskija ŚMI, patryjarch pamior u svajoj rezidencyi ŭ Pieradziełkinie.

Na pasadzie patryjarcha Maskoŭskaha i ŭsiaje Rusi Alaksij II znachodziŭsia ad 1990 hodu. Apošni zamiežny vizit u kastryčniku sioleta Alaksij II ździejśniŭ u Minsk.

Vosieńniu 2002 hoda Alaksij II u Astrachani pieranios ciažki insult. Na adnaŭleńnia zdaroŭja byŭ patrebny ceły hod. Rasijskija ŚMI niekalki razoŭ pieradavali, što ŭ Patryjarcha było dźvie kliničnyja śmierci. Praciahły čas jon lekavaŭsia ŭ adnym z špitalaŭ Šviejcaryi.

Pry patryjarchu Alaksiju II Rasijskaja pravasłaŭnaja carkva vyjšła z savieckaj niavoli. Patryjarch naležaŭ da pamiarkoŭnaj płyni i admiežavaŭsia ad krajnie šavinistyčnych ci izalacyjanisckich płyniaŭ u carkvie.

Pry hetym jon kateharyčna vystupaŭ suprać libieralizmu ŭ kultury i palitycy. Pry im carkva zaciata zmahałasia suprać aŭtakiefalii cerkvaŭ Ukrainy i Estonii, suprać viartańnia chramaŭ hreka-katalikam u Zachodniaj Ukrainie. U moŭnym pytańni pravasłaŭnaja carkva taksama nie pajšła na sastupki nacyjanalnym rucham, u tym liku i ŭ Biełarusi.

Razam z tym, byŭ pieraadoleny raskoł miž RPC i Rasijskaj zarubiežnaj carkvoj.

U suviazi sa śmierciu Alaksija II Sinod RPC źbirajecca na ekstrannaje pasiadžeńnie. Pavodle statutu RPC novy Patryjarch pavinien być abrany na Pamiesnym sabory ciaham paŭhodu.

Vyšejšaj asobaj RPC ciapier stanovicca archijarej, starejšy pa rukapałažeńni. Na dadzieny momant im źjaŭlajecca mitrapalit Kijeŭski Ŭładzimir.

Nastupnikami patryjarcha Alaksija II mohuć stać jak mitrapalit Smalenski i Kalininhradski Kiryła (Hundziejeŭ), mitrapalit Minski i Słucki Fiłaret (Vachramiejeŭ), mitrapalit Krucicki i Kałomienski Juvenalij (Pajarkaŭ), mitrapalit Kałužski i Baroŭski Klimient (Kapalin).

* * *

Patryjarch Alaksij II (sapraŭdnaje imia Alaksiej Rydyhier) naradziŭsia 23 lutaha 1929 hodu ŭ estonskim Talinie.

Budučy patryjarch pachodziŭ ź niamieckaha šlachieckaha rodu fon Rydyhieraŭ, jakija jašče ŭ XVIII stahodździ pryniali pravasłaŭje. Paśla Kastryčnickaj revalucyi siamja dzieda Alaksija II była vymušanaja pierajechać ź Pieciarburha ŭ niezaležnuju Estoniju. Baćka Alaksija Michaił Alaksandravič taksama byŭ pravasłaŭnym śviatarom.

U 1947 hodzie z druhoj sproby jon pastupiŭ u Leninhradskuju duchoŭnuju sieminaryju. U 1949 hodzie staŭ studentam duchoŭnaj akademii, jakuju skončyŭ u 1953 h., atrymaŭšy zvańnie kandydata bahasłaŭja. 15 krasavika byŭ rukapakładzieny ŭ praśvitary i vyznačany nastajacielem Bahajaŭlenskaha chramu ŭ šachciorskim horadzie Jychvie (Estonija). Paśla słužyŭ nastajacielem u Tartu.

Paśla śmierci maci Alaksiej Rydyhier prymaje manaski postryh. U 1961 Śviatarny Sinod abviaščaje jaho japiskapam Talinskim i Estonskim. Na talinskaj kafiedry jon znachodziŭsia čverć stahodździa. U 1986 hodzie staŭ mitrapalitam Leninhradskim i Naŭharodskim.

Alaksij II 6 červienia 1990 hoda zamianiŭ na pasadzie patryjarcha Maskoŭskaha i ŭsiaje Rusi pamierłaha Pimiena. Kandydatura mitr. Alaksija atrymała najbolš hałasoŭ siarod troch pretendentaŭ, što byli ŭklučanyja ŭ hałasavańnie.

10 červienia 1990 hoda adbyłasia intranizacyja Alaksija II u Bohajaŭlenskim sabory Maskvy. Jon staŭ pieršym patryjarcham, jaki vykarystoŭvaŭ u svaim imieni numar.

U 1998 hodzie Łukašenka ŭznaharodziŭ Alaksija II ordenam imia Franciška Skaryny, u 2004 — ordenam Družby narodaŭ, a sioleta — ordenam Pašany.

Biełaruskija ziemli Maskoŭski patryjarchat adnosić da svajoj jurysdykcyi. Alaksij II šeść razoŭ naviedvaŭ Biełaruś.

Kamientary da artykuła