U Bransku biełarus ź pistaletam adabraŭ u 19-hadovaha chłopca mabilnik
Incydent adbyŭsia ŭviečary 10 listapada ŭ Bransku. Da 19-hadovaha chłopca padyšoŭ nieznajomy i, pahražajučy pistaletam, zapatrabavaŭ addać darahi mabilny telefon. Atrymaŭšy jaho, razbojnik źnik, paviedamlaje «Briansk Today».
A chłopiec paviedamiŭ pra zdareńnie ŭ palicyju. Apieratyŭnikam spatrebiłasia mienš za sutki, kab zatrymać złamyśnika. Im akazaŭsia raniej sudzimy 21-hadovy hramadzianin Biełarusi. Pry zatrymańni ŭ žylli padazravanaha znajšli pnieŭmatyčny pistalet i mabilnik paciarpiełaha.
Raspačali kryminalnuju spravu. Za razboj biełarusu ciapier pahražaje da dziesiaci hadoŭ pazbaŭleńnia voli z nakładańniem bujnoha štrafu.