Novaja sistema raźmiaščeńnia kamientaroŭ. I što heta za Kłub.nn.by?
rehistrujciesia!
«Naša Niva» ŭvodzić rehistracyju kamientataraŭ. Heta nie naš kapryz, a patrabavańnie zakanadaŭstva (na našu dumku, biessensoŭnaje i durnoje, ale što zrobiš). My vyrašyli spałučyć abaviazkovaje z karysnym i zaadno stvaryć Kłub Našaj Nivy.
Navošta treba Kłub čytačoŭ?
«Naša Niva» — pryvatnaje vydańnie, my ćviorda zachoŭvajem niezaležnaść ad uładaŭ i roŭnaaddalenaść ad palityčnych siłaŭ i biznes-kołaŭ. U NN vialikaja viernaja aŭdytoryja, jakaja cenić vydańnie i padzialaje našy ideały niezaležnaści, biełaruskaści i pravavoj dziaržavy.
My starajemsia adpaviadać času, adhukacca na zapyty čytačoŭ, tamu stvarajem novyja pradukty: tolki sioleta my zapuścili hlancavy časopis «Naša historyja», zapracavała biełaruskamoŭnaja Afiša, startavaŭ prajekt videahutarak «Tok».
Kłub čytačoŭ stvarajecca dla taho, kab dapamahčy «Našaj Nivie» raźvivacca i nadalej.
Raniej haziety mieli papiarovuju viersiju. Kuplajučy jaje, čytačy finansavali vydańnie. Ciapier dla karystalnikaŭ stała našmat zručniej atrymlivać infarmacyju ŭ internecie. Adnak vydańniam pa-raniejšamu treba zarablać nie tolki na rekłamie. Finansavańnie čytačami dazvalaje nie zaležać tolki ad biznesu, ci tolki ad sponsaraŭ. Našaj Nivie važna zaležać najpierš ad svaich čytačoŭ, heta zaruka suviazi z vami.
Jak ustupić u Kłub?
Kab stać siabram Kłuba čytačoŭ, treba zarehistravacca ŭ adpaviednym raździele sajta (club.nn.by). Siabroŭstva ŭ kłubie pakul biaspłatnaje, ale ź ciaham času my prapanujem usim achvotnym apłacić nievialikuju sumu. Siabry Kłuba buduć mieć dostup da płatnaha kantentu, naprykład, artykułaŭ «Našaj historyi», a taksama da inšych płatnych pasłuh.
U toj ža čas nam važna, kab biełarusacentryčny pohlad razychodziŭsia jak maha šyrej, tamu my zachavajem biaspłatny dostup da navin.
Tak budavali svaju madel nie tolki «Ńju-Jork tajms», «Hazieta vyborča», ale i vydańni mienšych, suvymiernych ź Biełaruśsiu krain, dzie havorka nie tolki pra atrymańnie infarmacyi, a i pra nacyjanalnuju salidarnaść.
Ustupić u Kłub
«Vy što, u Biełarusi heta niemahčyma!»
Tak kaža šmat chto. Płacić za toje, što znachodzicca ŭ internecie, dla mnohich pakul niazvykła. Ale ź ciaham času da hetaha ŭsio adno daviadziecca pryjści. Pamiatajcie, što isnavańnie ŚMI, niezaležnych ad dziaržavy, — nieabchodnaja ŭmova dla narmalnaha raźvićcia krainy.
«Naša Niva» pieršaj u Biełarusi rašajecca na taki krok. My vierym u vas, našych čytačoŭ — daśledavańni pakazvajuć, što ŭ «Našaj Nivy» viernaja, aktyŭnaja i zamožnaja aŭdytoryja.
Jakija pieravahi atrymajuć siabry Kłuba?
Pačynajučy z hetaha miesiaca, «Naša Niva» pačnie ŭvodzić płatny dostup da niekatorych artykułaŭ. Heta buduć artykuły «Našaj historyi», archiŭnyja materyjały, ale nie tolki. Dla siabroŭ Kłuba ŭsie artykuły buduć biaspłatnyja.
Karystalniki zmohuć kuplać adzinkavy dostup da asobnych artykułaŭ. Siabroŭstva ž budzie dazvalać čytać ich nieabmiežavanuju kolkaść.
Narešcie, siabroŭstva ŭ Kłubie — heta status. Być fundataram pieršaj biełaruskaj haziety, sutvorcam nacyi prestyžna.
Novaje ŭ kamientavańni na sajcie
Što da kamientavańnia, to, kali łaska, pastaŭciesia da novaŭviadzieńniaŭ spakojna i z razumieńniem. Identyfikacyju dastatkova prajści adzin raz, a paśla vy zmožacie pisać pad svaim nikam, jak i raniej.
Dla mnohich «Naša Niva» — heta adzinaja mahčymaść vykazvacca pa-biełarusku va ŭščent rusifikavanym hramadstvie. Nie spyniajcie pisać kamientary na NN.by. Dla nas žyćciova nieabchodna čuć vašy hałasy!
Štodnia na «NN» prychodzić da 1500 samych roznych kamientaŭ — i ŭchvalnych, i dyskusijnych, i aburanych. Heta treciaja pa papularnaści placoŭka dla abmierkavańniaŭ siarod biełaruskich ŚMI.
Čynoŭniki chacieli b, kab hołas hramadstva ŭ internecie zacich. Rasčarujcie ich — davajcie pakažam, što hatovyja i nadalej vykazvać svajo mierkavańnie.
Jak stvaryć akaŭnt?
Kali vy zachočacie pakinuć kamientar, sajt prapanuje vam zarehistravać akaŭnt. Jaho možna stvaryć z nula, a možna dla zručnaści pryviazać da svajho profilu ŭ Huhle, Fejsbuku albo Ukantakcie.
Samaje hałoŭnaje — prydumajcie sabie nik. Heta vaša imia na sajcie, tamu abiarycie jaho ŭzvažana. I nie zabudźciesia pra nadziejny parol, kab jaho nichto nie zmoh uzłamać.
Nie chvalujciesia, hetaj infarmacyi nie pabačać inšyja karystalniki.
Narešcie, vam treba budzie atrymać SMS-kod. Ukažycie svoj numar mabilnika i naciśnicie «atrymać kod». Praź niekalki siekund na vaš telefon pryjdzie adpaviednaje paviedamleńnie z numaram, uviadzicie jaho. Heta treba zrabić tolki adzin raz, pry rehistracyi.
Usio, ciapier vaš kamientar budzie dasłany maderataru. Kali paviedamleńnie nie parušaje Praviły maderacyi, jano budzie nieŭzabavie apublikavana na sajcie.
Što pra mianie daviedajecca dziaržava?
Infarmacyja pra zarehistravanych karystalnikaŭ zachoŭvajecca na sierviery NN.BY. Chostar adkazvaje za toje, kab jana nie trapiła ŭ čužyja ruki. Dziaržava moža zapatrabavać infarmacyju pra karystalnika tolki kali, naprykład, zavodzicca kryminalnaja sprava. U pryncypie, dla čytačoŭ mała što źmianiajecca — milicyja i raniej mieła tuju ž mahčymaść pry patrebie vyznačyć IP-adras taho ci inšaha internet-karystalnika. Ale nie było nivodnaha vypadku, kab niekaha pryciahvali da adkaznaści za mierkavańnie, apublikavanaje na našym sajcie. My tak i tak nie publikavali i nie budziem publikavać kamientaŭ, jakija parušajuć normaŭ zakonaŭ i prystojnaści.
Ci mahu ja vydalić svoj akaŭnt?
Tak, u adpaviednaści z zakanadaŭstvam. My pavinny na ŭsialaki vypadak zachoŭvać infarmacyju pra vas jašče na praciahu paŭhoda, ale paśla vydalim jaje.
Ci mahu ja zarehistravać niekalki nikaŭ?
Na adzin telefonny numar moža być zarehistravany tolki adzin akaŭnt. Kali ŭ vas niekalki numaroŭ — rehistrujcie roznyja niki na ich.
Rehistravać abaviazkova na biełaruski numar?
Nie, vy možacie zarehistravacca na numar luboj krainy śvietu. NN čytajuć na ŭsich kantynientach. Budźcie i vy častkaj našaj mocnaj biełaruskaj supolnaści.