Try pryčyny, čamu nie varta chudzieć da Novaha hoda
Nie za harami Novy hod, i, značyć, u žyćci mnohich žančyn pačynajecca pieryjad pad devizam «terminova schudnieć». U baraćbu za idealny siłuet iduć usie najaŭnyja srodki: kupić bieźlimitny abaniemient u trenažornuju zału i hadzinami prapadać na biehavoj darožcy, znajści ŭ huhle lubuju dyjetu, kupić anłajn-kurs prahramy charčavańnia, prajści 20 dzion supiersuški… Adnak usie hetyja patuhi zusim nie karysnyja, asabliva kali da hetaha nijakich fizičnych zaniatkaŭ i zdarovaha charčavańnia ŭ vašym žyćci nie było.
Što vas čakaje? Vy pačynajecie svaju supierdyjetu na hrečcy z kiefiram, nabyvajecie abaniemient u trenažorku i stroha prytrymlivajeciesia režymu ŭvieś śniežań. Chutčej za ŭsio, vam navat udasca skinuć vahu, ale pad boj kurantaŭ vobraz Papiałuški pieratvorycca ŭ harbuz, na jakoj traščyć sukienka. Žadańnie pakaštavać usio samaje smačnaje sa stała akazvajecca našmat macniejšym za ŭsie asatnija.
Samaje niepryjemnaje paśla zdarajecca ŭ pieršyja dni studzienia: strełka vahaŭ pa-zdradnicku viartajecca da ličby da dyjety i navat imkniecca trochi napierad. Stanovicca vielmi kryŭdna, što stolki sił i času było zhublena ŭ śniežni darma. U hety samy momant źnikaje luboje žadańnie i matyvacyja praciahvać zajmacca sportam, trymać siabie ŭ rukach i nie paddavacca spakusam. Usio valicca ŭ piekła, i tak da nastupnaha śniežnia.
Ale jość dobraja navina: usiaho hetaha možna nie dapuścić, kali razumieć, jak pracuje vaš arhanizm.
Efiekt «Jakoha djabła?!»
Lubaja žorstkaja dyjeta i abmiežavańni niepaźbiežna pryvodziać da zryvu, varta choć krychu zrabić krok nie ŭ toj bok.
Vyhladaje heta prykładna tak: trymałasia, nie jeła, ciarpieła, kavałačak torta źjeła i potym: «Aj, jakoha djabła! Hublać niama čaho, dzie adzin kavałak, tam i try!»
Da takoha adčajnaha kroku pryvodzić pačućcio viny, jano i prymušaje znoŭ «karać» siabie ježaj za niezakonna źjedzienaje. Atrymlivajecca zamknionaje koła: palohka-škadavańnie- pakarańnie-jašče vialikaja palohka-jašče bolšaje škadavańnie i jašče bolšaje pakarańnie. Hetuju źjavu vyvučyła i apisała kamanda navukoŭcaŭ Dženet Palivi i Picier Chierman z Univiersiteta Taronta. U svaim daśledavańni jany paraŭnali reakcyi tych, chto chudzieje i chto nie, padzialili ich na try hrupy. Pieršaj dali vypić sytny małočny kaktejl, druhoj — dva takija samyja kaktejli, a treciuju hrupu pakinuli hałodnaj. Paśla im prapanavali źjeści stolki maroziva, kolki ŭlezie, nibyta meta ekśpierymientu — apisać smak praduktu. Vynik byŭ nastupnym: tyja, chto nie siadzieŭ na dyjecie i byŭ hałodny, źjeli šmat maroziva, paśla adnaho kaktejlu — krychu mienš, a sytaja hrupa z dvuma kaktejlami zastałasia praktyčna abyjakavaj da desiertu. A voś siarod tych, chto chudzieje, vyniki kardynalna adroźnivalisia: hrupa z dvuma kaktejlami źjeła navat bolš marožanaha, čym hałodnaja, bo ŭsio i tak pajšło pad adchon.
Nie budźcie zanadta strohimi da sabie, nie staŭcie žorstkija ramki, pierastańcie abvinavačvać. Pasprabujcie spakojna stavicca da lubych adchileńniaŭ ad dyjety, uziaŭšy za ŭstanoŭku dumki nakštałt: «Tak, pierajeła, niepryjemna, ale z kim nie byvaje, prosta bolš tak nie budu, ale praciahnu zajmacca i pierahledžu svoj racyjon». Łajalnaje staŭleńnie da siabie zaŭsiody bolš kanstruktyŭna, čym ahresiŭnaje. A pravilna składzieny racyjon charčavańnia nie pryviadzie da zryvaŭ.
Centr zadavalnieńnia
Čałaviečy arhanizm — vielmi składanaja sistema, poŭnaja supiarečnaściaŭ. Z adnaho boku, u nas jość błukajučy nierv, kancy jakoha raźmieščanyja ŭ ścienkach straŭnika. Jany paviedamlajuć mozhu pra toje, što «stop, chopić jeści, ty syty». Z druhoha boku, u mozhu jość adździeł, jaki adkazvaje za zadavalnieńnie, jon taki ž važny, jak i adździeł, što adkazvaje za praciah žyćcia (charčavańnie, seks). Heta značyć, što atrymlivać zadavalnieńnie nam prosta žyćciova nieabchodna. A padčas pryjomu smačnaj ježy ŭ centry zadavalnieńnia vypracoŭvajecca harmon dafamin, mienavita jon i šturchaje nas na nieabdumanyja ŭčynki.
Navahodniaja noč — heta idealnaje miesca złačynstva: receptary dafaminu vielmi adčuvalnyja, a vakoł tak šmat krynic — manipulataraŭ apietytam: tłušč, sol, sałodkaje.
Niezdarma mienavita hetyja try kampanienty tak mocna na nas upłyvajuć: evalucyjna skłałasia tak, što tłušč dapamahaŭ zachoŭvać ciapło i enierhiju našym prodkam, kab pieražyć zimu, sałodki smak dazvalaŭ adroźnivać jadomuju sadavinu i jahady ad kisłych i atrutnych, a sol ratavała ad abiazvodžvańnia, zachoŭvajučy vadu.
Čym macniej my ŭździejničajem na receptary dafaminu, tym bolš jaho pavinna vypracoŭvacca, a dozy, adpaviedna, pavinny rabicca bolšymi. Tamu spałučeńnie sałodkaha z tłustym vyklikaje roŭna takuju ž ejfaryju i zaležnaść, jak i drennyja zvyčki.
Kali vy ŭvieś čas da śviataŭ siłkavalisia narmalna, paŭnavartasna, nie hladzieli praź ślozy na pirožnyja, časam sabie dazvalali pryjemnyja słabaści, to potym nie ŭźniknie žadańnia siabie paškadavać, uznaharodzić ježaj. Na hety kont taksama pravodziłasia daśledavańnie, dzie vyznačali reakcyju mozhu ludziej na dyjecie i nie. U im paddoślednym pakazvali roznyja malunki i nazirali za tym, jakaja častka mozhu aktyvizavałasia, kali na ekranie źjaŭlałasia vyjava sa smačnaj ježaj. U tych, chto siadzieŭ na dyjecie, aktyvizavaŭsia centr mozhu, jaki adkazvaje za ŭznaharodžańnie, u toj čas jak u biezdyjetnych hety centr zastavaŭsia spakojnym i reahavaŭ na inšyja vyjavy.
«Sindrom mačałki»
Navukoviec Brajan Edvards pryśviaciŭ cełuju pracu temie, jak čałavieku, jaki pachudzieŭ, zachavać svaje dasiahnieńni. Da prykładu, u zhrabnaha čałavieka kala 40 młrd tłuščavych kletak, a ŭ taho, chto pakutuje na atłuścieńnie, — 120 młrd. Pry pachudzieńni hetyja 120 (abo 40 młrd kletak) nikudy nie sychodziać, jany zastajucca na miescy, prosta pamianšajucca ŭ pamiery i stanoviacca jak «vycisnutaja mačałka», adsiul takaja paciešnaje nazva.
Spustošanyja kletki lohka i chutka, nibyta mačałka, napaŭniajucca tłuščam ź niavydatkavanych kałoryj, što časta vyklikana nastupstvami ekstremalnaha pachudzieńnia — źnižanym mietabalizmam i pavyšanym hoładam albo prosta vymušanaj nieruchomaściu: pajeli, pasiadzieli z rodnymi, harbaty papili, televizar pahladzieli, sieli ŭ mašynu, pryjechali dadomu i lahli spać, a lišak kałoryj u hety čas adkładajecca ŭ pustyja tłuščavyja kletki, jakija ŭžo hatovyja.
Heta značyć, što tolki što schudnieły čałaviek za navahodniuju noč, naprykład, chutčej i lahčej adkładzie ŭsio lišniaje ŭ tłušč, čym toj, chto nie chudzieŭ. Bo druhomu ŭ arhaniźmie jašče treba dadatkova stvarać novyja kletki, a heta kudy daŭžej i składaniej, čym zapoŭnić staryja.
Praściej kažučy, žyvicie ŭ svaim zvyčajnym rytmie, mahčyma, budźcie niedzie kryšačku bolš strohimi ŭ racyjonie, ale nie pazbaŭlajcie siabie radaściaŭ žyćcia, bolš ruchajciesia, ale nie kidajciesia ŭ krajnaści, bo nastupstvaŭ paśla nie abiarešsia. Nu, a kali vielmi chočacca rychtavać cieła da Novaha hoda, to lepš aryjentujciesia na 2020. Vyniki vas sapraŭdy pryjemna ździviać.