Milicyjant z Pružanaŭ prahałasavaŭ u sacsietkach za ŭstupleńnie Biełarusi ŭ skład Rasii: «Moža, zarobak pavysiać»
U supołcy «Padsłuchana Pružany» ŭ sacyjalnaj sietcy Ukantakcie źjaviłasia apytańnie na temu: «Ci chočacie vy ŭ Rasiju». Pryčynaj dla hetaha stała vykazvańnie Uładzimira Žyrynoŭskaha ab tym, što bolšaść biełarusaŭ padtrymajuć ustupleńnie krainy ŭ Rasiju.
U vyniku ŭ apytańni ŭziali ŭdzieł bolš za 300 čałaviek. 60% prahałasavali, što nie chočuć u skład inšaj dziaržavy. 26% — skazali «za». A 14% prahałasavali z farmuloŭkaj: «Mahčyma, zarobak pavysiać. Napeŭna, tak».
Viktar Klimaševič. Fota sad7.pruzhany.by.
Siarod tych, chto prahałasavaŭ za apošni varyjant, — staronka Inśpiekcyi pa spravach niepaŭnaletnich (ISN) Pružanskaha RUUS. My patelefanavali ŭ RUUS, dzie nam paviedamili, što staronka sapraŭdnaja, jaje viadzie načalnik ISN Viktar Klimaševič.
Nam udałosia źviazacca sa spadarom Klimaševičam. «Kali tam niešta i prahałasavana, to tolki pa pamyłcy», — zapeŭniŭ jon.
Na pytańnie, ci maje dostup da hetaj staronki jašče niechta, aproč Klimaševiča, jon nie adkazaŭ.
«A vy zadavolenyja svaim zarobkam?» — spytali my ŭ milicyjaniera. «Ja nie budu z vami razmaŭlać, bo nie baču, z kim razmaŭlaju», — na hetych słovach Klimaševič kinuŭ słuchaŭku.
Praź piać chvilin paśla našaha telefanavańnia «hołas» byŭ admienieny. Ale na skrynšotach vidać, za jaki varyjant hałasavali z hetaha akaŭnta.