Čytačy «Našaj Nivy» vybrali Čałaviekam hoda abaroncaŭ Kurapat
Hanna Šapućka. Fota Voli Aficeravaj.
Hanna Šapućka, Pavieł Sieviaryniec dy inšyja abaroncy Kurapat stali ludźmi hoda pa viersii čytačoŭ «Našaj Nivy».
U hałasavańni na našym sajcie ŭziali ŭdzieł kala 2000 čałaviek. Za abaroncaŭ Kurapat prahałasavali 33% ź ich.
Nahadajem, što Hanna Šapućka, Pavieł Sieviaryniec, Źmicier Daškievič adyhrali hałoŭnuju rolu ŭ kampanii suprać adkryćcia restarana «Pajedziem pajadzim» la miesca pachavańnia dziasiatkaŭ tysiač achviar savieckaha režymu. Samaachviarnaja vachta la zabaŭlalnaha kompleksu pryciahnuła ŭvahu da Kurapat, tam źjaviŭsia dziaržaŭny manumient, paŭstali novyja kryžy.
Na druhim miescy, na dumku čytačoŭ NN, — Pavieł Biełavus dy inšyja arhanizatary śviatkavańnia 100-hodździa abviaščeńnia Biełaruskaj Narodnaj Respubliki. Jany sabrali 24% hałasoŭ.
Fota Siarhieja Hudzilina.
Na treciaje miesca vyjšaŭ novy premjer-ministr krainy Siarhiej Rumas — kiraŭnik urada z čałaviečym tvaram, ź jakim mnohija źviazvajuć nadziei na rost ekanomiki.
Na čaćviortaje miesca čytačy pastavili achviaru «Spravy BiełTA» Marynu Zołatavu.
Akramia taho, u śpisie byli i sabrali niamała hałasoŭ Hleb Łabadzienka, inicyjatar ustanoŭki pomnika Kaściušku, a taksama bankir Viktar Babaryka, fundatar šmatlikich biełaruskich kulturnych prajektaŭ, i novaja zorka biełaruskaha tenisa Aryna Sabalenka.