Siem spraŭ, jakija varta zrabić, kali ty baišsia rasijskaj ahresii
Chvaroba siezonu — «kramloŭskaja lichamanka». Jak ź joj zmahacca?
Zdajecca, i zima viarnułasia pryhožaja, i lichtaryki na vulicach pa-śviatočnamu śvieciać, a na dušy niejak tryvožna. Što tam zadumali ŭ Maskvie? A našyja — ci ŭtrymajucca? Ci budziem my žyć u svajoj dziaržavie, ci tut usim pačnuć zapraŭlać maskoŭskija «braty»? Ci vykrucimsia? Ažno ruki apuskajucca. Kali ty adčuvaješ toje samaje, to dyjahnaz taki: u ciabie kramloŭskaja lichamanka. Što rabić? Voś siem paradaŭ, jakija mohuć dapamahčy:
1. Darabi spravu
Vybiery sioleta adnu spravu, jakaja tabie lažyć da serca, ale jakuju ty ŭvieś čas adkładaješ. Vaźmisia za jaje. Zrabi jaje dobra. Vielmi dobra. Jakasna. Skancentrujsia. Nie kidaj spravu niedaroblenaj, a daviadzi jaje da vyniku. Chaj heta budzie całkam dasiažnaja reč. Zdać na pravy, pafarbavać dziedavu chatu, navučycca płavać, narešcie. Kluč nie ŭ tym, kab zrabić heta lepiej za inšych, a ŭ tym, kab zrabić spravu lepiej za siabie samoha.
2. Pamirysia z voraham
Chutčej za ŭsio, letaś ty z kimści pasvaryŭsia ci mieŭ nieparazumieńnie, jakoje, niby brud na botach, pryciahnuŭ z saboj u novy hod. A moža być, vorah — heta niechta blizki, toj, kaho ty, nasamreč, lubiš? Padumaj: ci toje, za što vy pasvarylisia, sapraŭdy takoje važnaje, niepapraŭnaje? Mo jość u svarcy i tvaja vina? Źbiarysia z ducham, pavinšuj taho, z kim pasvarany, sa śviatami. Paprasi prabačeńnia. A što, kali raptam niepryjaciel pieratvorycca ŭ siabra?
3. Uzhadaj siabra
Pamiataješ, jak vy tavaryšavali? Ale prajšoŭ čas, žyćcio zakruciłasia, vy zhubili suviaź. Nie razmaŭlali ŭžo sto hadoŭ — navat i telefanavać užo niejak niajomka, praŭda? A voś i darma. Nie treba biantežycca. Šmat času na toje, kab nabrać numar, nie treba. Kali ty ŭzhadaješ, što za kanapu zavalilisia sto rubloŭ, ty ž nie pakinieš ich tam u pyle, praŭda? A novaha siabra znajści našmat składaniej, čym hrošy.
4. Padtrymaj svajo
Časam my zdajomsia sabie biezdapamožnymi. Žyćcio — biaskoncy kruhabieh pamiž chataj dy pracaj. Chiba ž mahčyma tut napisać i vydać knihu, stvaryć aŭdyjoalbom, zładzić śviata pad bieł-čyrvona-biełymi ściahami? Ale ty možaš i heta! Zajdzi na Tałaku ci Vulej dy pahartaj śpis biełaruskich prajektaŭ. Vybiary toj, jaki bolš za ŭsio padabajecca, i padtrymaj jaho choć by samaj maleńkaj sumaj. Ci dałučysia da kłuba čytačoŭ Našaj Nivy , padtrymaj sioletni Dzień Voli. Vybar bahaty. Hałoŭnaje tut — adnosiny. Ty nie prosta achviaruješ hrošy, a robiš hety prajekt svaim. Bieź ciabie jon nie ździejśnicca, heta praŭda! Sačy za prajektam, źviažysia z aŭtarami, atrymaj asałodu, kali jon budzie realizavany. Dapamahać — heta vielmi pryjemna, nieskładana i dziejsna.
5. Padsiłkuj dumki
Vyznač sabie čas bieź internetu i sacsietak. Naprykład, pravodź vychodnyja biez smartfona. Ci vaźmi za praviła nie razmaŭlać ź dziećmi i rodnymi, hartajučy naviny na ekranie. Razłahińsia z fejsbuku na kampjutary ci vydali dadatak na telefonie. Biaskonca spažyvajučy infarmacyju, ty trymaješ siabie ŭ psichałahičnym napružańni i ŭ toj ža čas nie daješ sabie času padumać. Sum — heta najlepšy stymulatar dla tvorčaści. Pasumuj piatnaccać chvilinaŭ. Pieršyja piać ty budzieš leźci na ścianu, pad čas druhich piaci ty zadumaješsia pra hałoŭnaje ŭ žyćci, a na apošnich piaci ty ŭžo budzieš viedać, što rabić.
6. Pabač novaje
Prydumaj sabie čas i miesca dla vandroŭki. Voś, naprykład, luby z Mahdeburhskich haradoŭ, jakija tak pryhoža pakazvaje Siarhiej Hudzilin. U nas pakul što adnosna niedarahija kvitki na pojezd ci aŭtobus, dy i vizaŭ nijakich dla pajezdak pa ŭłasnaj krainie, na ščaście, nie treba. Nu a kali zusim niama mahčymaści ci času dla padarožžaŭ, to prosta, kali idzieš na pracu, zrabi koła i prajdzisia nieznajomym, novym šlacham.
7. Nie partyzań
Usio čaściej i čaściej na vulicach sustrakajucca ludzi, jakija hutarać pa-biełarusku. Ty čuješ heta, raduješsia ciškom, uśmichaješsia, i kročyš dalej. Inakš kažučy, pa staroj biełaruskaj zvyčcy partyzaniš, chavaješsia ad svaich. Moža, chopić užo saromiecca? Kali pačuješ biełaruskuju movu — pavitajsia z čałaviekam. Pierakińciesia słoŭcam. Padziakujcie adzin adnomu, što vy jość. Paciśnicie adzin adnomu ruki na raźvitańnie.
P.S. Nie palanujsia, razdrukuj hetyja parady na arkušyku i pračytaj praz hod. Całkam vierahodna, što RF nas tak i nie zachopić. Zatoje ŭjavi, nakolki bolš mocnym i bahatym budzieš ty sam. Pamiataj: chulihan vybiraje sabie ŭ achviary spužanych adzinočak, a na siabroŭskuju kampaniju nie lezie. Skarystaj hety hod, kab umacavacca samomu — krainie heta pojdzie na karyść.