Na pradpryjemstvie ŭ Maładziečnie byk pakalečyŭ rabotnika. Mužčyna pamior u balnicy
Pra zdareńnie «Rehijanalnaj haziecie» raskazała aficyjny pradstaŭnik Śledčaha kamiteta pa Minskaj vobłaści Taćciana Biełanoh:
— Uviečary piataha studzienia na pradpryjemstvie ŭ Maładziečnie byk traŭmavaŭ mužčynu. Paciarpiełaha dastavili ŭ balnicu ŭ Maładziečnie. Vośmaha studzienia jon pamior.
Pa słovach Taćciany Biełanoh, RASK Maładziečna pravodzić pravierku.
Śledčyja hutarać ź vidavočcami, vyvučać dakumienty pradpryjemstva, umovy pracy. Kančatkovaja pryčyna śmierci 51-hadovaha rabotnika budzie viadomaja paśla miedycynskaj ekśpiertyzy.