ZŠA patrabuje ad Kitaja padpisańnia handlovaha pahadnieńnia z prynižalnymi ŭmovami
Abaviazkovaj umovaj dla zaklučeńnia pieramirja ŭ handlovaj vajnie pamiž ZŠA i Kitajem mohuć stać rehularnyja pravierki Vašynhtonam taho, jak Piekin budzie pravodzić abiacanyja handlovyja reformy.
Pra heta paviedamlaje Reuters sa spasyłkaj na krynicy, znajomyja z chodam pieramovaŭ pamiž dźviuma krainami.
«Pahroza taryfaŭ nie źniknie, navat kali budzie ździełka», — pryvodzić ahienctva słovy adnaho sa svaich surazmoŭcaŭ.
Choć kitajski bok niezadavoleny takoj umovaj Vašynhtona, adnak jana nie stała pryčynaj zryvu pieramovaŭ. U hutarcy z ahienctvam krynica, blizkaja da kitajskaha boku, skazała, što Złučanyja Štaty chočuć «pieryjadyčnych pravierak», ale pakul nie jasna, jak časta.
«Heta padobna da prynižeńnia», — padkreśliła adna z krynic. «Ale, mahčyma, abodva baki zmohuć znajści sposab zachavać tvar dla kitajskaha ŭrada», — dadaŭ jon.
Pra hatoŭnaść Trampa zaklučyć handlovaje pieramirje z Kitajem Bloomberg sa spasyłkaj na svaje krynicy paviedamlała u pačatku studzienia. Adznačałasia, što amierykanski lidar takim čynam imkniecca narmalizavać abstanoŭku na amierykanskich rynkach. Napiaredadni The Wall Street Journal paviedamiła, što kiraŭnik Minfina ZŠA Styvien Mnučyn prapanavaŭ ideju častkovaj admieny taryfaŭ abo poŭnaj admovy ad ich, kab dać Piekinu stymuł pajści na bolšyja sastupki ŭ handlovaj vajnie. Bolš žorstkaj pazycyi prytrymlivajecca handlovy pradstaŭnik ZŠA Robiert Łajtchajzier, jaki zaniepakojeny tym, što lubaja sastupka moža razhladacca jak prykmieta słabaści. Tramp choča, kab ździełku zaklučyŭ mienavita Łajtchajzier, adznačała vydańnie.
Krynicy Reuters dadajuć, što rehularnyja pravierki mohuć stać adnym z mahčymych rašeńniaŭ dla zadavalnieńnia patrabavańniaŭ Łajtchajziera. Surazmoŭcy zajaŭlajuć, što pahroza novych taryfaŭ budzie vykarystanaja dla praciahu reformaŭ.
Handlovaja vajna pamiž Vašynhtonam i Piekinam spałachnuła paśla taho, jak administracyja prezidenta ZŠA Donalda Trampa ŭviała ŭvaznyja myty na kitajskija tavary, kab akazać cisk na Piekin z metaj vykanańnia doŭhaha śpisu patrabavańniaŭ, jakija źmianili b umovy handlu pamiž dźviuma krainami. Patrabavańni ŭklučajuć u siabie źmieny ŭ palitycy Kitaja pa abaronie intelektualnaj ułasnaści, pieradačy technałohij, pramysłovych subsidyjach i źniaćci handlovych barjeraŭ.