Kiraŭnik Dziaržkamvajenprama: Pradavać MZKC nie budziem
Fota: pres-słužby kampanii
Mahčymy prodaž Minskaha zavoda kołavych ciahačoŭ staršynia Dziaržkamvajenprama Biełarusi Raman Hałoŭčanka nazvaŭ pustymi dadumkami, piša Tut.by.
— Chaču raźviejać uvieś tuman nad hetaj situacyjaj. Nijakich razmoŭ ab prodažy, adčužeńni abo abmienie nie viadziecca. Pieramovy ab prodažy abmiarkoŭvalisia niejki čas tamu, ale jany byli zakryty ŭ siłu abstavinaŭ. Ciapier jaje nichto nie piedaluje. Nie varta pryviazvać kanjunkturnyja rečy da pracy MZKC, — zajaviŭ jon.
Kamientujučy vizit rasijskaha pasła na zavod MZKC Raman Hałoŭčanka adznačyŭ, što Michaił Babič naviedvaŭ pradpryjemstva ŭ ramkach svajoj dziejnaści jak pasła. «Tamu jon pavinien znajomicca z asnoŭnymi pradpryjemstvami jakija pracujuć u krainie jaho akredytacyi i pastaŭlajuć svaju pradukcyju ŭ Rasiju», — rastłumačyŭ kiraŭnik Dziaržkamvajenprama.
Pa słovach Ramana Hałoŭčanki, rasijskamu pasłu była pakazana technika i abstalavańnia na jakim jana vyrablajecca i raskazana, na jakich umovach jana pastaŭlajecca.
— Michaił Babič vysoka acaniŭ uzrovień pradpryjemstva. Ale nijakich tarhoŭ nie adbyvajecca — usio heta pustyja domysły na fonie našaj pracy z rasijskimi partniorami, — padkreśliŭ Raman Hałoŭčanka.
Taksama staršynia Dziaržkamvajenprama adznačyŭ, što zakazy na pradpryjemstvie jość da 2025 hoda. Heta šasi dla SPA, branieviki i inšaja technika — MZKC dyviersifikuje pastaŭki i asvojvaje novyja siehmienty.
Nahadajem, 21 studzienia pasoł Rasii ŭ Biełarusi Michaił Babič naviedaŭ MZKC. Paśla hetaha šerah analitykaŭ vykazali zdahadku, što Maskva, skarystaŭšysia finansavymi ciažkaściami Minska z-za padatkovaha manieŭru ŭ rasijskaj naftavaj halinie, raspačnie čarhovuju sprobu kupić Minski zavod kołavych ciahačoŭ.