«Sprava BiełTA». Sudździa zakryje praces Zołatavaj. Na adzin dzień
Sudździa pastanaviŭ pravieści adno zakrytaje pasiedžańnie, dzie buduć razhladać pryvatnuju pierapisku. Jano adbudziecca ŭ paniadziełak 18 lutaha, piša Radyjo Svaboda.
U piatnicu 15 lutaha na pracesie pa spravie Maryny Zołatavaj praciahnuŭsia dopyt śviedak.
U zalu byli vyklikanyja redaktary partała Tut.by Hanna Kałtyhina, Hanna Rudenka i Halina Ułasik.
Paśla dopytu kožnaj ź ich prakuror padavała chadajnictva ab abviaščeńni materyjałaŭ papiaredniaha śledstva, dziaržaŭny abvinavaŭca tłumačyła heta razychodžańniami.
Jak stała viadoma padčas ahučvańnia hetych materyjałaŭ, u spravie jość tekst pryvatnaj pierapiski pamiž redaktarami partała Tut.by. Pavodle śledstva, jany byli atrymanyja paśla vyvučeńnia kanfiskavanych u redaktaraŭ Tut.by nośbitaŭ infarmacyi i telefonaŭ.
Usie śviedki, a taksama abvinavačanaja Maryna Zołatava paprasili sud ahučvać materyjały pryvatnaj pierapiski ŭ zakrytym režymie. Sudździa vyznačyŭ dla hetaha asobny dzień — paniadziełak 18 lutaha, paśla 14.15.
Prysutničać na hetym pasiedžańni dazvolać tolki ŭdzielnikam pracesu — abvinavačanaj Marynie Zołatavaj, jaje advakatu, prakuroru, sudździ, sakrataru suda, a taksama advakatam ahienctva BiełTA i jurystu haziety «Biełaruś siehodnia».