Kiraŭnik dydžytał-kamandy Zialenskaha detalova raskazaŭ pra ich stratehiju pracy ŭ sacsietkach i miesiendžarach
Michaił Fiodaraŭ kuryruje ŭ Zie!kamandzie — takuju samanazvu vykarystoŭvajuć u štabie kandydata ŭ prezidenty Ukrainy — stratehiju dydžytał-prasoŭvańnia Zialenskaha. Inšymi słovami, prasoŭvańnie pa ličbavych kanałach kamunikacyj. Hetaja tema cikavaja i biełarusam, tamu my prapanujem vašaj uvazie materyjał «Ukrainskaj praŭdy» pra heta.
Hałoŭnyja kankurenty kandydata-komika aryjentujucca na pabudovu vybarčych «sietak», prystasavanych dla kupli hałasoŭ. Stratehija Zialenskaha taksama zaviazana na «sietcy», tolki nie vybarčuju ŭ akruhach, a hłabalnuju — internet.
Michaił Fiodaraŭ i jaho dydžytał-adździeł adkazvaje ŭ Zie!kamandzie za pabudovu puła ŭłasnych miedyja — samaha vialikaha Telegram-kanała siarod palitykaŭ, Instagram-supolnaści i sietki ŭłasnych YouTube-kanałaŭ.
Ab supraćdziejańni «čarnusie» ŭ internecie
Ciažka vyznačyć, chto heta robić. Ale vielmi dziŭna — kali zachodziš, skažam, u supołku «Bienin kłoŭn», to prapanoŭvaje «staronki, padobnyja da hetaj». I tam pastajanna vybivaje abo staronku «Baćkaŭščyny», abo Julii Cimašenka.
Takoje supadzieńnie. Prosta ludzi, jakija łajkajuć adnu staronku, łajkajuć i druhuju. U mianie navat skrynšot byŭ.
Uličvajučy, što heta masavyja palityčnyja supołki, to heta moža być i supadzieńnie. Tamu my nie možam kazać, chto kankretna zapuskaje hetuju čarnuchu. Ale realna rekłamy vielmi šmat.
My niadaŭna vykacili naš asnoŭny sajt — zie2019.som. Tam u nas jość artykuł sa skrynšotami hetaj antyrekłamy. My zaklikajem ludziej: kali vy bačycie hetuju rekłamu, to naciskajcie na jaje maksimalna i zaŭsiody — kab marnavać biudžety našych apanientaŭ.
My zaŭvažyli, što kali my šmat klikajem, to zvyčajna ŭ ich skančajucca hrošy na pošuk.
Ja daŭno pracuju ŭ biznesie, i kali baču, kolki prahladaŭ hetaj rekłamy na YouTube, jak pošuk pracuje, razumieju pryncyp aŭkcyjonu i, pa maim subjektyŭnym adčuvańni, takaja rekłamnaja kampanija abychodzicca dzieści ad 20 tysiač dalaraŭ u dzień. Mienš, čym za 20 tysiač, niemahčyma trapić z takim achopam u rekłamu ŭ miesiendžar, Viber i hetak dalej.
A my nijak nie budziem z hetaj antyrekłamaj zmahacca, nie budziem zapuskać bolš rekłamy, tamu što ŭ nas niama takich biudžetaŭ.
Adzinaje, my možam navučyć ludziej — što heta takoje, jak heta pracuje, rastłumačyć pryncyp pracy rekłamy. My pačynajem šerah publikacyj, dzie budziem pra heta kazać i raz na tydzień publikavać: «Heta kaštuje stolki, bačycie, naciskajcie, chaj traciacca hrošy».
U nas tam navat taki podpis jość: «Škada tolki adnaho. Heta našy z vami hrošy… jakija jany skrali ŭ nas ža».
My padajom skarhi ŭ YouTube abo FB, u Google, skardzimsia na kantekstavuju rekłamu. Ale, na žal, jany nie na našym baku. Sprava ŭ tym, što hetaja rekłama časta źmianiajecca, z adnaho sajta na inšy idzie.
Zaraz tam niejki «Rupar», da hetaha było niešta inšaje. Zabanili my adzin akaŭnt, jany zapuścili praz 10 chvilin druhi — i ŭsio.
U hetym niama sensu. Jość vielmi šmat staronak, jakija stvarajucca za 2 chviliny i z dapamohaj rekłamnych hrošaj tarhietujucca vielmi chutka.
Zaraz tam, dzie možna kamientavać, šmat ludziej pišuć: «My bačym, kolki rekłamy, my razumiejem, što robim pravilnaje rašeńnie, budziem hałasavać za Zialenskaha, raz jaho tak močać».
U nas pastajanna pracuje sistema manitorynhu anłajn. Jana dazvalaje fiksavać usie zhadki pra nas. Sa słovam «Zialenski» ŭ FB, Instagram i YouTube našy ŭłasnyja miedyja znachodziacca ŭ topie pa zhadvańniach. Tamu my mocna nie pieražyvajem.
Bolš za ŭsio hetaj antyrekłamy — heta miedyjnaja rekłama Google, kali kuplajucca baniery. Navat nie ŭ FB abo na Youtube. Jany atakujuć usie samyja papularnyja ŚMI Ukrainy, pracujuć na aŭdytoryi vydańniaŭ, a nie suprać našaj aŭdytoryi ŭ sacsietkach.
Im ciažka technična vyznačyć našu aŭdytoryju. Kali «Piotr Parašenka» — heta asobny intares u FB, «Julija Cimašenka» — asobny intares, to «95 kvartała» i «Zialenskaha» tam niama.
Adpaviedna, ciažka trapić u aŭdytoryju, jakaja niejak z nami źviazanaja. Adziny sposab — heta ci ŭstalavać ich piksiel na naš sajt, što niemahčyma, abo atrymać dostup da našaj bazy dadzienych, što taksama niemahčyma. Tamu jany tarhietujucca na vielmi šyrokuju aŭdytoryju.
Kali vy spytajecie na vulicy šarahovaha čałavieka, ci bačyŭ jon rekłamu Zialenskaha, jon skaža «nie». A ci bačyŭ rekłamu «Bienin kłoŭn»? Tak. Tamu što ŭ ich vielmi šyrokaje tarhietavańnie i z-za hetaha — vialikija biudžety.
Pra fejki i pra toje, što ź imi rabić
Fiodaraŭ: «Dumaju, da druhoha tura, kali my nie vyjhrajem raniej, to Zie!Ofisy buduć u kožnym horadzie»
Fejki pastajanna ŭźnikajuć. Navat kali ich błakavać, uźniknuć novyja. Tamu ja vyrašyŭ: niachaj ŭźnikajuć. My śpiecyjalna zapuścili akcyju «Zie!fiejk» — prydumajcie «najlepšy» fejk pra nas, chočam heta ŭsio abiasceńvać.
Jak markietołah, ja liču, što čym bolš zhadak pra nas, čym bolš my ŭ stužcy ŭ ludziej u pazityŭnym ci niehatyŭnym kantekście, usio roŭna heta dla nas dobra. Tamu što ŭ nas jość centralnaja linija, ludzi viedajuć našy pryncypy, kaštoŭnaści, u nas jość aficyjnaja staronka. Kali jany niešta zapadozrać, jany zojduć i pahladziać.
U nas užo hatovy sajt, jaki my chutka vykładziem, dzie vy ŭstaŭlajecie spasyłku na navinu pra nas, sistema praviaraje našy sacsietki i na asnovie hetaha kaža — fejk heta ci nie fejk.
Pra dydžytał-kamandu Zie!
U nas pracuje adna i taja ž kamanda na ŭsie sacyjalnyja miedyja. U nas niama raźmierkavańnia, chto kankretna adkazvaje za FB, Instagram i h.d.
U nas jość dva kapirajtary, jakija rychtujuć kantent i dla FB, i dla Instagram, i dla Telegram, i dla Twitter. Jość cim-lidar, jaki imi kiruje. Hetyja ž ludzi pišuć email-rassyłki.
Usiaho ŭ dydžytał-kamandzie ludziej, jakija pracujuć tut na fułtajm, čałaviek, napeŭna, 10. Viadoma ž, šmat kamand pracujuć na aŭtsorsie — pa kantekstnaj rekłamie, raspracoŭščyki, kamanda pa manitorynhu, sacyjołahi.
Ahułam zaraz zadziejničany čałaviek 30.
Pra sietku Zie!miedyja
My budujem vielmi ekśpierymientalnuju strukturu dla našaj krainy i ŭ pryncypie dla palityki. U nas jość našy ŭłasnyja miedyja. Heta FB, naš aficyjny Instagram, naš aficyjny telehram-kanał i Twitter. Jašče ŭ nas jość dva YouTube-kanały — Zie!prezident na 210 tysiač padpisčykaŭ i «Kamanda Zialenskaha» na 20 tysiač.
Da dydžytału ja adnošu našu bazu mejłaŭ, tamu što heta 540 tysiač adrasoŭ.
Niadaŭna trapiŭsia stary artykuł dydžytał-kiraŭnika kampanii Navalnaha. U Maskvie na apošnich vybarach, kali jon bałatavaŭsia, u ich baza była ŭsiaho na 50 tysiač mejłaŭ.
Ja da taho, što 500 tysiač dla Ukrainy — heta vielmi šmat, my sami nie čakali. Voś heta ŭsio našy aficyjnyja ŭłasnyja miedyja.
Jašče jość miedyja roznych krain. Heta staronki FB, Instagram, Telegram u roznych krainach. My abjadnali ich u adnu supołku — heta Zie!world. My sabrali ludziej z roznych krain, jakija pakidali zajaŭku ŭ nas na sajcie, zrabili tryhiernuju rassyłku i zaprasili ich u supołku FB. Tam ich sabrałasia 4—5 tysiač čałaviek.
Tam varjackaja aktyŭnaść, vialikaja kolkaść kamientaroŭ. U kožnaj krainie, dzie ludzi pisali aktyŭna, my znajšli kurataraŭ.
U nas jość kuratar pa Izraili, Amierycy, Aŭstralii, Japonii, Kanadzie i hetak dalej. Kožny ź ich stvaryŭ svaju supołku. Takich supolnaściaŭ užo 8 abo 10, budzie 20—30.
My vydzielili jurystaŭ kožnaj supolnaści, jany adkazvajuć na pytańni, jak hałasavać, jak stać naziralnikam u hetaj krainie i hetak dalej.
Akramia ŭsiaho hetaha jość jašče staronki rehijonaŭ — u Instagram, FB i Telegram. U kožnaj vobłaści. U niekatorych abłaściach jość navat pa niekalki. Naprykład, asobnaja supolnaść jość u Kryvoha Roha i Dnieprapiatroŭskaj vobłaści.
Dydžytał-kaardynatar jość u kožnaj hetaj supolnaści, kožnaha horada.
Kali my pačynali kampaniju, ja pastaviŭ im metu: u nas pavinny być samyja maštabnyja supołki pa kolkaści padpisčykaŭ i ŭklučeńni. Samyja vialikija ŭ krainie.
Zaraz my praktyčna va ŭsich haradach, akramia, pa-mojmu, Lvova, stvaryli samyja vialikija supołki siarod inšych palityčnych siłaŭ pa kolkaści padpisčykaŭ.
Hetaja stratehija była zaviedama niestandartnaja. Zvyčajna ludzi staviać hałačku aficyjnaj supołki, a ŭsio astatniaje błakujuć. A my raźmierkavali pa rehijonach.
Ja padumaŭ, što ŭ nas kandydat taki narodny, my słuchajem ludziej, i kłasna budzie, kali našy kaardynatary ŭ rehijonach buduć kamunikavać ź ludźmi naŭprost, raźvivać miascovuju śpiecyfiku. Voś heta naša supolnaść.
Jość karta, jość spasyłki na ŭsie staronki rehijonaŭ. My viadziom unutrany rejtynh, chto bolš padpisčykaŭ źbiare.
My im stavim roznyja cikavyja zadačy. Naprykład, arhanizavać fłešmob, zapisać u ludziej intervju na vulicy. Heta ŭsie našy vałanciory, jany fihačać.
U nas jość i nieaficyjnyja staronki. Ja vielmi časta, u tym liku ad našaj kamandy, čuŭ, typu: Boža, błakirujcie ich terminova! Ale ja pryniaŭ supraćlehłaje rašeńnie. My sabrali kantakty ŭsich tych ludziej, jakija stvaryli nieaficyjnyja supolnaści, i stvaryli asobny čat u Telegram — Zie!administratary.
Nie viedaju da kanca, pravilna my zrabili ci nie, ale intuityŭna zdajecca, što ŭsio słušna robim. Ciapier hetych kantaktaŭ užo kala 2,5 tysiačy. Kali my vykładvajem niejki kantent, my vydajem jaho hetym administrataram u zychodnikach: dyzajn, videa — usio dajom im pieršymi.
My dajom im kantent, dzielimsia infarmacyjaj, a jany ŭ siabie vykładvajuć pravieranuju infarmacyju. Takim čynam za 1 siekundu my adrazu na tysiačy supolnaściaŭ raznosim patrebnyja nam pasyły.
My vyłučyli asobnaha kaardynatara, jaki ź imi kantaktuje. Jon daŭ svoj telehram, jany jamu pišuć u pryvat. My chočam ich usich sabrać u Kijevie, pahutaryć ź imi. Heta ŭsio pazityŭčaki, ludzi, jakija nas padtrymlivajuć, viaduć kampaniju jak mohuć.
Tamu što ŭ nas jość peŭny pryncyp u dydžytał-kampanii i va ŭsioj kampanii — nikoli nie havaryć hadaści pra našych apanientaŭ, vydavać tolki paćvierdžanuju infarmacyju i vieści kampaniju maksimalna pazityŭna.
My stvaryli tematyčnyja staronki, jakija dapamahajuć nam realizavać kampaniju. Ni dla kaho nie sakret, što pa biudžecie ŭ nas abmiežavanaja kampanija. Dosyć abmiežavanaja, ja b skazaŭ. Nam nie chapaje ludziej, jakija pracujuć u dydžytale, ajcišnikaŭ, dyzajnieraŭ i hetak dalej.
Tamu my stvaryli takuju supolnaść — Zie!dydžytał, u jakoj sabrali ajcišnikaŭ, zrabili tryhiernuju rassyłku, napisali va ŭsie supołki — tam užo 6,5 tysiačy čałaviek, ajcišnikaŭ i dyzajnieraŭ.
My, naprykład, praviali konkurs stykieraŭ. Atrymali kala 40 stykier-pakaŭ, ź jakich vysunuli 8 ci 10 na hałasavańnie. Ahulnaja kolkaść stykieraŭ, jakija ŭžo ŭstalavali, u miežach 50 tysiač.
Kali my vykacili sajt, pieršymi napisali ŭ Zie!dydžytał: «Chłopcy, možacie pratestavać?» Nam na poštu pačali pisać pra bahi na sajcie, dzie što padpravić. Heta supolnaść ludziej, jakija nam dapamahajuć rabić kampaniju.
Ciapier užo jość Zie!dydžytał, Zie!iurysty, Zie!łahisty, jakija buduć dapamahać naziralnikam u dzień vybaraŭ, tłumačyć, kamu kudy i jak jechać.
Jašče jość, heta nie sakret, sietka prykładna z 10 YouTube-kanałaŭ, jakija my stvarajem. Ja nie budu kazać ich nazvy. Jany ŭsie pazityŭnyja, jany ŭsio pra nas.
Heta kanały z karysnym kantentam, cikavymi narezkami z našaha błoha i hetak dalej. Tam sumarnaja aŭdytoryja dosyć vialikaja. Pakul dakładna nie chaču raskazvać. Chaj heta budzie siurpryzam dla ŭsich našych «siabroŭ».
Naš aficyjny kanał u Telegram zaraz na 7 miescy va Ukrainie (bolš za 82 tysiač padpisčykaŭ — UP). My, naprykład, zapuskajem takuju akcyju — «Sustreča ź Zialenskim», dzie ty možaš padpisacca na naš Telegram-kanał, zapoŭnić formu i vyjhrać sustreču. Ja chaču da kanca kampanii zrabić naš kanał numaram adzin u krainie.
Telegram — heta vielmi mocny resurs, samy chutki sposab znosin. Niešta zdarajecca na vybarčym učastku — my pišam ludziam u miesiendžary. Na heta i chočam zrabić vialikuju staŭku.
Na YouTube ŭ našaha vłoha ŭžo miljon prahladaŭ u niekatorych vypuskaŭ. My troški rekłamavali dva vypuski, ale apošnija navat nie rekłamavali.
My pačali chutka vykładvać novyja roliki, navat nie paśpieli prajści maderacyju na rekłamu (adabreńnie rekłamy ad YouTube zajmaje kala 24 hadzin — UP).
Naš kanał nie manietyzavany. Na samaj spravie, my na jaho kapiejki patracili, ale ab manietyzacyi nie dumali. Ja dumaju, heta było b niesumlenna, kali b my ŭklučyli manietyzacyju. Dy i zarabili b tam kapiejki.
Ab efiektyŭnaści i košcie dydžytał-kampanii
Usia dydžytał-kampanija — heta dzieści 1% ahulnaha biudžetu kampanii. Efiekt ad jaje vielmi vialiki. Možam jaho paličyć pa kolkaści zhadak.
Samyja aktyŭnyja miedyja pa zhadvańni Zialenskaha — heta našy miedyja, my, pa sutnaści, lidary mierkavańniaŭ dla našaj metavaj aŭdytoryi. Usiudy — u Youtube, Instagram i FB.
Kali b u nas byli svaje ŚMI, to možna było b i tam, napeŭna, vajavać. Ale ŭ nas niama ŚMI, tamu my tam nie lidary.
Ale ŭ nas «Kamanda Zialenskaha» na pieršym miescy ŭ FB siarod usich palityčnych supolnaściaŭ! U Instagram «Kamanda Zialenskaha» — 170 tysiač padpisčykaŭ. U Telegram — my na pieršym miescy.
Fiodaraŭ: «Ciapier my praktyčna va ŭsich haradach, akramia, pa-mojmu, Lvova, stvaryli samyja vialikija supołki siarod inšych palityčnych siłaŭ pa kolkaści padpisčykaŭ».
My ciapier na ŭzroŭni z prezidentam pa kolkaści zhadak u internecie ŭ cełym. Čaściakom pra nas zhadvajuć navat bolš, čym pra jaho. Dla mianie heta peŭny KPI.
Plus toje, što dobra razychodzicca. Mnie zdajecca, vielmi dobra zajšła ideja z «Zie». Heta stratehija, jakuju my prydumali, namalavali, vielmi prostaja, zrazumiełaja.
I my ŭžo bačym šerah navin, u jakich prosta kažuć «Zie». Heta vydatna zajšło. Heta taksama častka dydžytał-stratehii — lohka, zapaminajecca, stała modna.
Jašče adzin z pakazčykaŭ dla nas — heta naviedvalnaść. Naš sajt naviedała ŭžo bolš za 2 miljony 300 tysiač unikalnych karystalnikaŭ. Heta prykładna ŭzrovień prezidenckaj kampanii Abamy ŭ 2008 hodzie. Kali pahladzieć pa ŭzroŭni raźvićcia internetu ŭ ZŠA tady i ŭ nas ciapier, to heta supastaŭnyja ličby.
Ahulnaja kolkaść padpisčykaŭ na ŭsich našych resursach — žurnalisty zahnalisia i paličyli — u rajonie 1 miljona 200 tysiač čałaviek.
Pra toje, jak zrabić z padpisčyka vybarščyka
My rabili takuju štuku — adpraŭlali ŭsim prahramu kandydata, paprasili razdrukavać i razdać babulam, znajomym, jakija nie siadziać u internecie.
Atrymali nazad kala 3 tysiač fatahrafij. Ludzi razdavali pa 5—10 prahram. Heta — da śloz.
Syn pryjazdžaje da mamy ŭ viosku, pryvozić joj našu prahramu, fatahrafujecca ź joj, z susiedziami. My z usimi padpisantami kamunikujem, prosim ich kantentam dzialicca, prosim raspaviadać pra nas.
Zaraz, kali my ŭžo adkryli Zie!ofisy pa ŭsioj krainie, miascovyja ofisy pačali kamunikavać ź ludźmi na miescach.
Uciahnutaść padpisčykaŭ možna aceńvać pa dvuch paramietrach. Nakolki jany ŭciahnutyja ŭ anłajn- i ŭ afłajn-aktyŭnaść.
Kali my havorym pra anłajn, to našu prahramu z 500 tysiač ludziej, jakija zapoŭnili ankiety, acanili 110 tysiač. Pračytali i pastavili kožnym punkcie acenku ad 1 da 10!
Heta dosyć dobry pakazčyk. Pakazčyk open-read, adkryćcio našych listoŭ, dachodzić da 60%. Heta taksama niamała.
Što tyčycca afłajn, što ciapier ciažka zamiarać, tamu što my tolki adkryli ofisy, ludzi tolki pajšli. Ale, pa maich adčuvańniach, budzie dastatkova vysokaja, dumaju, tysiač 100 pojduć u ofisy pa krainie.
Asnoŭnaja meta kaardynatara — heta abarona hałasoŭ. My razumiejem, što budzie dziejacca. Zie!ofis — heta nie jačejki palityčnaj partyi. Zaraz heta ludzi, jakim my daviarajem i jakija pavinny abaranić hałasy.
Ciapier staić varjackaja čarha ludziej, jakija chočuć adkryvać Zie!ofisy. Na žal, my nie možam hetaha dapuścić, my nie hatovyja da hetaha. Ale my adkryvajem u kožnym rehijonie ŭsio bolš i bolš Zie!ofisaŭ.
Dumaju, da druhoha tura, kali my nie vyjhrajem raniej, to Zie!ofisy buduć u kožnym horadzie.
U nas na sajcie jość funkcyja «Stać naziralnikam». Stać naziralnikam nie tak prosta. Treba, naprykład, pahladzieć navučalnaje videa, paśla hetaha prajści test. Heta pravierka na adekvatnaść.
U achvotnych stać našymi naziralnikami my źbirajem usie dadzienyja ŭ anłajnie. Asobnaje pytańnie, ci hatovyja jany pajechać naziralnikam u siało, kali što. Paśla hetaha prychodziać ankiety z zapoŭnienymi dadzienymi, ludzi prychodziać i staviać podpis.
Kali pobač niama Zie!ofisa, to my pa skajpie razmaŭlajem, a dakumienty jany padpisvajuć i pieradajuć «Novaj poštaj».
Nam treba 30 tysiač naziralnikaŭ. My płanujem 10 tysiač nabrać praz sajt. Ale, moža, i ŭsie 30 atrymajem. Pa členach kamisij inšaja pracedura padačy, bolš dakumientaŭ. Jany prychodziać u Zie!ofisy. I adsotkaŭ 50% my ŭžo nabrali.