Hanna Kanapackaja rezka raskrytykavała zajavu Ejsmant pra dyktaturu: Fašyzm i nacyzm pačynalisia hetaksama
Deputat Pałaty pradstaŭnikoŭ Hanna Kanapackaja aburyłasia zajavami pres-sakratara Łukašenki Natalli Ejsmant, što dyktatura moža stać brendam krainy.
«Zajavy pres-sakratara prezidenta ab tym, što dyktatura — heta brend Biełarusi, a za dyktaturami budučynia ŭ zaŭtrašnim śviecie, akramia abureńnia ničoha nie vyklikajuć. Jakaja karotkaja, akazvajecca, byvaje čałaviečaja pamiać i vialikaje hłupstva», — napisała Hanna Kanapackaja ŭ svaim fejsbuku.
Natalla Ejsmant: U śviecie moža źjavicca zapyt na dyktaturu. Heta naš brend
«Vyznačeńnie dyktatury nie moža «pa-roznamu ŭsprymacca» i niasie adzin, całkam peŭny sens. Dyktatura — heta adzinaŭładnaje i biezumoŭnaje praŭleńnie adnoj asoby, jakoje charaktaryzujecca adsutnaściu realnaha padziełu halin ułady, padaŭleńniem hramadzianskich svabod i hramadzianskaj supolnaści, hraničnaj kancentracyjaj ułady, nadzvyčaj šyrokim užyvańniem palityčnych represij, hvałtu, praźmiernym razrastańniem represiŭna-palicejskaha (milicejskaha) aparata. I nijakaha pazityŭnaha sensu ŭ hetym vyznačeńni niama i być nie moža.
Dyktatura — heta zło, kroŭ, śmierć i vajna», — adznačaje deputat.
«Biełarusy jak nichto inšyja viedajuć i pamiatajuć, što takoje sučasnyja dyktatury — italjanski fašyzm i niamiecki nacyzm. Pačynalisia jany hetak ža sama, jak siońnia kaža pres-sakratar, prykryvajučysia dyscyplinaj i paradkam. Čym skončylisia takija manipulacyi biełarusy dobra viedajuć - śmierciu miljonaŭ našych suajčyńnikaŭ», — dadała Hanna Kanapackaja..