U Minsku 18-hadovaja dziaŭčyna prasiła aformić dla jaje kredytku za ŭznaharodžańnie i źnikała razam z hrašyma
Takim ža sposabam zarablaŭ jaje małady čałaviek, a taksama maci dziaŭčyny.
Dziaŭčyna, pa infarmacyi milicyi, prasiła aformić dla jaje kredytnuju kartu za ŭznaharodžańnie, abiacajučy spraŭna płacić pa kredycie, ale abaviazak u vyniku pavisaŭ na žadajučych zarabić.
Fota HUUS Minharvykankama
Vyjaŭleny adzin fakt supraćpraŭnaj dziejnaści. Dziaŭčyna znajšła praz znajomych maładoha čałavieka, jaki chacieŭ padzarabić. Jamu nieabchodna było źjavicca z pašpartam u adździaleńnie banka, paviedamić nazvanyja dziaŭčynaj dadzienyja pra miesca pracy i zarobak, a zatym aformić kredytnuju kartu z depazitam 3000 rubloŭ
Małady čałaviek atrymaŭ za svaju «pracu» ŭznaharodžańnie, a praź niekatory čas bank zapatrabavaŭ pakryć doŭh. Dziaŭčyna na suviaź nie vychodziła.
Fihurantka paviedamiła, što hrašyma z bankaŭskaj karty jana raźličyłasia ŭ kramie bytavoj techniki. Tavar zatym pradała za pałovu cany.
Ustanoŭlena, što padobnym sposabam zarablaŭ na žyćcio były małady čałaviek fihurantki, u dačynieńni da jaho taksama zaviedziena kryminalnaja sprava.
U milicyi jość padstavy mierkavać, što dziaŭčyna moža być datyčnaja da šerahu anałahičnych złačynstvaŭ, u spravie mohuć być zamiašanyja i jaje siabroŭki, jakija, jak miarkujecca, dapamahali šukać «klijentaŭ».
«Suma ŭznaharodžańnia vahałasia ad 150 da 400 rubloŭ», - raspaviała sb.by aficyjny pradstaŭnik Pieršamajskaha RUUS Kaciaryna Dabravolskaja.
U milicyi adznačajuć, što i maci dziaŭčyny zajmałasia padobnym promysłam. Ciapier jana adbyvaje pakarańnie ŭ vyhladzie pazbaŭleńnia voli.