Dom Zianona Łomacia ŭ Rakavie
+ fota
Staršynia Kamitetu dziaržkantrolu maje lecišča ŭ miastečku Rakaŭ — koliś samym blizkim da Minsku punkcie Panskaj Polščy. Dom adšukaŭ karespandent Polskaha radyjo dla zamiežža.
Staršynia Kamitetu dziaržkantrolu Zianon Łomać maje lecišča ŭ miastečku Rakaŭ — koliś samym blizkim da Minsku punkcie Panskaj Polščy. Dom adšukaŭ karespandent Polskaha radyjo dla zamiežža.
Dom Łomacia vam pakaža kožny ŭ Rakavie. Jašče b — paśla taho, jak vysoki načalnik prydbaŭ tut chatku hadoŭ piać tamu, miascovuju kramu adrazu ž adramantavali. Rakaŭčuki ličać, što hetyja padziei źviazanyja.
Prabirajusia pa śniezie na ŭskrainu Rakava — i na adnoj z vułačak pieradapošni dom — jakraz toj, što ja šukaju. Cahlany, z mansardaj. Pry im — altanka dy parniki, krychu dalej — aharod. Dahledžany płot, u dvary mierźnie sabačka.
A voś i čałaviek. Jak vyśviatlajecca — heta susied Łomacia, spadar Viktar. Jon pradprymalnik, robić namahilnyja pomniki. Pra vysokaha susieda raspaviadaje achvotna: “Vielmi dobry čałaviek. Prosty taki, pazityŭny”.
Chata, jakuju prydbaŭ Łomać, zbudavanaja ŭ 1988 hodzie. Viktar pryhadvaje jaje historyju: “Pradaŭ jaje čałaviek z čarnobylskaj zony. Jen zbudavaŭ jaje kaliści, pažyŭ, a paśla niečaha vyrašyŭ pierajechać”.
Viktar kaža, što nie viedaje, za kolki Łomać nabyŭ hety dom.
Niečakanaściu dla mianie stała toje, što staršynia Dziaržkantrolu nie hrebuje sam pakorpacca ŭ hradach. Łomaci poŭnaściu hadujuć usio svajo! Pamidory, hurki, bulbu rańniuju j zvyčajnuju. Pracujuć ad viasny da vosieni. Letam uvohule žyvuć tut praktyčna, uzimku pryjaždžajuć časam… Zbolšaha žonka jahonaja ŭ hradach dy na aharodzie pracuje — Luboŭ Mikałajeŭna.
Viktar viedaje, što dačok Łomacia zavuć Vieranika j Alena. I kaža, što ziać Łomacia, jakoha pasadzili — heta, nibyta, muž Aleny. Nahadajem, major Aleh Raščenia ŭžo doŭhi čas znachodzicca ŭ SIZA, jaho abvinavačvajuć za «niezakonnuju pradprymalnickuju dziejnaść, jakuju ździajśniała arhanizavanaja hrupa». Maksimalny termin pa hetym artykule — 9 hadoŭ.
Viktar uzdychaje i kaža, što sam Łomać — vyklučna ščyry i sumlenny čałaviek. U prykład pryvodzić jahonuju mašynu — daloka nie novy «Ford».
Na susiedniaj vulicy dźvie babulki raspaviadajuć, jak žonka Łomacia chodzić ź imi razam u carkvu: “Da spoviedzi prychodzić ź siamjoj”.
Inšaja susiedka Zianona Łomacia na prośbu staršyni Kamitetu dziaržkantrolu chodzić karmić jahonaha sabačku, jaki achoŭvaje chatu. Ad kamientaroŭ žančyna ŭstrymlivajecca, a tolki hołasna pačynaje lamantavać, čamu ja fatahrafuju chatu biez dazvołu, i pahražaje vyklikać milicyju.