Niaklajeŭ apublikavaŭ vierš u padtrymku salihorskaha školnika Hiermana Lebiedzia
Uładzimir Niaklajeŭ svaim vieršam padtrymaŭ vučnia salihorskaj himnazii №1 dziesiacikłaśnika Hiermana Lebiedzia, jaki apublikavaŭ u sacsietkach vierš pra bieł-čyrvona-bieły ściah i hierb «Pahonia», ale kłasnaja kiraŭnica zahadała jaho vydalić.
Narodu moža zaścić zrok
Biez daj pryčyny.
Dy bačyć Boža kožny krok
Na zvod Ajčyny.
U vočy vam adpłaty čas
Zirnie surova.
Kab dzieci apraŭdali vas
Viarnicie Movu!
Niama pačatkaŭ i kancoŭ,
Usio — praciah
Kab nie ŭskipieła ŭ žyłach kroŭ —
Viarnicie Ściah!
Ułady śvierb, što vas skubie,
I słavy śvierb,
Pakińcie ŭsio svajo sabie —
Viarnicie Hierb!
Dalboh, pra heta nie sa zła
Malusia ŭ skrusie,
A kab ziamla vas pryniała
Na Biełarusi
Hetamu vieršu 20 hod, ale zaraz spadar Uładzimir apublikavaŭ jaho ŭ svaim fb u padtrymku chłopca. «Macujsia, Hierman Lebiedź! Ty małajčyna!» — napisaŭ jon.