Łukašenka pra kanflikty ŭ śviecie: Usio haryć ad hałoŭnych suśvietnych hulcoŭ
Pra heta Alaksandr Łukašenka zajaviŭ siońnia ŭ intervju tureckamu infarmacyjnamu ahienctvu «Anadału», paviedamlaje BiełTA.
Alaksandr Łukašenka adznačyŭ, što kanflikty ŭ śviecie ŭspychvajuć u roznych kropkach: «Siońnia stvorana napružańnie zusim pobač kala našych miežaŭ — va Ukrainie. U Vieniesuele vy viedajecie, što adbyvajecca (daj boh, kab heta nie pierarasło ŭ niejki mižnarodny kanflikt i sutyknieńnie). Vy bačycie, što adbyvajecca ŭ Livii, i heta tolki pačatak. Vy bačycie i adčuvajecie ŭžo jak hramadzianin Turcyi, što adbyvajecca pobač z vami — u Siryi, Iraku, kurdskaja prablema dla vas vielmi važnaja».
Jon vykazaŭ upeŭnienaść, što raz padobnyja kanflikty ŭźnikajuć, značyć, jany kamuści patrebnyja. «Moj tezis paćviardžaje toje, što hetyja kanflikty ŭźnikajuć u krainach z bahatymi pryrodnymi resursami, jakija zajmajuć najvažniejšaje hieapalityčnaje stanovišča na karcie śvietu, — skazaŭ Alaksandr Łukašenka. — Značyć, kamuści patrebnyja hetyja resursy, chto-niebudź choča ŭpłyvać na tyja dziaržavy, jakija zajmajuć heta hieahrafična i stratehična važnaje stanovišča».
«Nam, biełarusam, heta treba? Nie! Navat kali my vielmi zacikaŭleny jak dziaržava ŭ pryrodnych vykapniach, resursach, tamu što my nie źjaŭlajemsia hłabalnym hulcom i nie majem impierskaj psichałohii, kab siłaj ŭpłyvać na tuju ci inšuju dziaržavu i zajmieć hetyja resursy», — adznačyŭ jon.
Jon zrabiŭ vysnovu, što «ŭsio haryć ad hałoŭnych suśvietnych hulcoŭ». «Što heta za hulcy, — vy ich dobra viedajecie. Adny siabie viaduć ahresiŭna, inšyja zajmajucca rytorykaj (vielmi šmat kryčać, ale tym nie mienš padlivajuć masła ŭ ahoń), trecija maŭkliva imknucca ŭpłyvać na situacyju ŭ śviecie. Ale kožny z hetych hihanckich hulcoŭ maje peŭnuju metu. Pierš za ŭsio hetuju - padzialaj i ŭładaj», — skazaŭ biełaruski lidar.