Adnoj z kiraŭnic novastvoranaha Instytuta stratehičnych daśledavańniaŭ stanie namieśnica Davydźki z «Biełaj Rusi»
Novastvorany Biełaruski instytut stratehičnych daśledavańniaŭ praciahvaje nabirać supracoŭnikaŭ.
Jak paviedamlaje adzin ź biełaruskich telehram-kanałaŭ,
adnu z kirujučych pasadaŭ zojmie Taćciana Šendzik. Pakul jana pracuje namieśnicaj staršyni praŭleńnia «Biełaj Rusi».
Hetuju infarmacyju «Našaj Nivie» paćvierdziŭ staršynia «Biełaj Rusi» Hienadź Davydźka.
«Heta praŭda, jana sychodzić, jana mnie kazała. Kim? Tam niekalki kirunkaŭ dziejnaści [u BISD], adzin ź ich jana budzie kuryravać. Jaki mienavita nie skažu, bajusia pamylicca», — skazaŭ Davydźka.
Źviazacca z samoj Šendzik pakul nie atrymałasia.
U «Biełaj Rusi» jana pracuje z 2009 hoda, a letaś stała namieśnicaj staršyni.
Na sajcie arhanizacyi adznačajecca, što Šendzik pachodzić ź vioski Słabada Smalavickaha rajona, skončyła Biełaruski dziaržaŭny piedahahičny ŭniviersitet i Akademiju kiravańnia, pracavała ŭ sistemie adukacyi.
Taćciana Šendzik, fota z Adnakłaśnikaŭ
Taćciana Šendzik — kandydat palityčnych navuk, tema jaje kandydackaj — «Hramadska-palityčnyja arhanizacyi ŭ palityčnaj sistemie Respubliki Biełaruś na prykładzie Respublikanskaha hramadskaha abjadnańnia «Biełaja Ruś».
Aŭtarefierat raboty dastupny na sajcie VAKa.
Siarod navukovych publikacyj takija artykuły ŭ «Biełaruskaj dumcy», jak, naprykład, «Biełaja Ruś»: šlach da partyi?», abo «Biełaja Ruś» jak elemient palityčnaj sistemy».
Raniej «Naša Niva» paviedamlała, što ŭ Biełaruski instytut stratehičnych daśledavańniaŭ uładkavaŭsia prapahandyst z BT Juryj Prakopaŭ.