Siłaviki ŭziali ŭ abarot bankiraŭ z-za zakupak
Pravaachoŭnyja orhany ŭžo bolš za miesiac rasśledujuć kryminalnyja spravy ŭ dačynieńni da šerahu bankaŭskich rabotnikaŭ. Pra heta TUT.BY raspaviali infarmavanyja krynicy.
«U spravie fihurujuć kiraŭniki adpaviednych padraździaleńniaŭ kamiercyjnych bankaŭ, top-mieniedžary kampanij-pastaŭščykoŭ. Byli pytańni i da rabotnikaŭ Nacbanka», — skazaŭ surazmoŭca. Adnak nie da ŭsich ź ich prymieniena miera strymańnia ŭ vyhladzie zaklučeńnia pad vartu. Pryčynaj zatrymańnia bankaŭskich kiraŭnikoŭ, pa słovach surazmoŭcy, stali pytańni zakupak abstalavańnia i softu pa zavyšanaj canie.
Tut.by pasprabavaŭ vyśvietlić miescaznachodžańnie niekatorych bankiraŭ i atrymać kamientar ź pieršych vusnaŭ.
Uładzimir Kučynski ź niadaŭnich časoŭ nie pracuje načalnikam Hałoŭnaha ŭpraŭleńnia infarmacyjnych technałohij Nacbanka. Niama na pracoŭnym miescy i kiraŭnika Hałoŭnaha ŭpraŭleńnia płaciežnych sistem i ličbavych technałohij Nacbanka Ihara Kudasava. «Kučynski ŭžo nie pracuje. Što tyčycca Kudasava, to jon na pracoŭnym miescy adsutničaje», — kanstatavali ŭ Nacbanku, ale nie nazvali pryčynu kadravych ratacyj i miescaznachodžańnie hetych asob.
Praciahły čas na pracoŭnym miescy adsutničaŭ i načalnik upraŭleńnia infarmacyjnaj biaśpieki Biełarusbanka Alaksiej Miłavanaŭ. Jaho padnačalenyja nie zmahli nazvać miescaznachodžańnie kiraŭnika. Zapyt nakiravany niekalki tydniaŭ tamu ŭ pres-słužbu Biełarusbanka zastaŭsia biez adkazu.
Načalnik adździeła arhanizacyi zakupak Banka VEB (Biełaruś) Alaksandr Lisafin byŭ na balničnym, raspaviali jaho padnačalenyja. Pres-słužba banka nie adkazała na zapyt.
U pres-słužbie KDB admovilisia ad kamientaroŭ.
Varta nahadać, što ŭ siaredzinie studzienia źjaviłasia infarmacyja pra zatrymańnie staršyni praŭleńnia AAT «Biełaruski mižbankavy raźlikovy centr» (BMRC) Fieliksa Kaśpiaroviča. 28 lutaha adbyłosia pasiedžańnie naziralnaj BMRC, na jakim pa prapanovie asnoŭnaha akcyjaniera — Nacbanka Biełarusi — na pasadu kiraŭnika centra byŭ pryznačany Aleh Karobjin. Raniej jon pracavaŭ vykanaŭčym dyrektaram i namieśnikam staršyni praŭleńnia Banka BiełVEB. Ihar Kudasaŭ u svoj čas uvachodziŭ u naziralnuju radu BMRC.