Kandrusievič pra situacyju ŭ Kurapatach: U hałavie nie ŭkładvajecca
Pra heta mitrapalit Minska-Mahiloŭski, arcybiskup Tadevuš Kandrusievič zajaviŭ u intervju Radyjo Racyja.
«Ja ciapier znachodžusia ŭ Biełastoku paśla ciažkaj apieracyi, na lačeńni. Adnak, viadoma, saču za padziejami. Ja mocna ŭzrušany, što zdymajuć kryžy. Napeŭna, jość šmat apanientaŭ, aśviečanyja jany ci nie aśviečanyja. Nie ŭ hetym sprava. Kryž zastajecca kryžom, navat kali jaho namalavać na ścianie. Tym bolš u takim miescy, dzie tak šmat ludziej zahinuła. I tym bolš, što heta adbyłosia padčas postu», — skazaŭ arcybiskup.
«Ja pavažaju Pravasłaŭnuju Carkvu. U ich taksama Tydzień prasłaŭleńnia Kryža. Napeŭna, tam treba rabić paradak. Heta treba było zrabić daŭnym-daŭno, ale jość jak jość. Mahčyma, treba było hetyja kryžy časova źniać, kab paśla ich pastavić. My taksama tak robim, ale pierad hetym kažam ludziam, što tak budzie.
I tut treba było, i ja ŭpeŭnieny ŭ hetym, zaklikać pradstaŭnikoŭ usich kanfiesij, nie budziem hladzieć: katolik, pravasłaŭny, habrej, vierujučy, niavierujučy, kab nie było hetaha sacyjalnaha vybuchu. Jon adbyŭsia. A treba było rastłumačyć ludziam.
I, viadoma, ja nie moh maŭčać, bo źniavaha kryža adbyvajecca. Tym bolš u takim miescy i ŭ taki čas!
Ja nie viedaju, chto takija kamandy daje. Heta čas Vialikaha postu. U hałavie prosta nie ŭkładvajecca. Usio heta možna było zrabić cyvilizavana.
Nie viedaju, kali viarnusia, mahčyma, niejkija razmovy buduć z uładami. Hetaja prablema nie patrebna ni našaj dziaržavie, ni našamu hramadstvu, ni našamu Kaściołu i Carkvie», — adznačyŭ Tadevuš Kandrusievič.