Kim Čen Yn pryhraziŭ udaram za sankcyi suprać KNDR
Fota ź Vikipiedyi
Kiraŭnik Paŭnočnaj Karei Kim Čen Yn zaklikaŭ nanosić udary pa tych, chto ŭpeŭnieny ŭ mahčymaści pastavić krainu na kaleni z dapamohaj sankcyj, pieradaje Yonhap sa spasyłkaj na paŭnočnakarejskaje ahienctva CTAK.
«My pavinny paśladoŭna padymać ściah sacyjalistyčnaj ekanomiki i nanosić udar pa tych, chto pamyłkova miarkuje, što jany mohuć pastavić nas na kaleni sankcyjami», — skazaŭ Kim Čen Yn na plenarnym pasiadžeńni kiroŭnaj partyi ŭ sieradu.
Pavodle jaho słoŭ, los revalucyi ŭ KNDR vyznačać upeŭnienaść u sabie i niezaležnaja ekanomika. Jak adznačaje Yonhap, z takoj zajavaj Kim Čen Yn vystupiŭ napiaredadni sustrečy prezidenta ZŠA Donalda Trampa i jaho paŭdniovakarejskaha kalehi Mun Čže Ina u Vašynhtonie — 11 krasavika baki pavinny abmierkavać padychod da vyrašeńnia jadziernaha pytańnia KNDR.
Dziaržsakratar ZŠA Majk Pampiea, vystupajučy na słuchańniach u sienacie, zajaviŭ, što administracyja Trampa chacieła b mieć mahčymaść častkova źmienšyć sankcyi suprać Pchieńjana, pakinuŭšy pry hetym bolšuju častku abmiežavańniaŭ u sile da toj pary, pakul režym Kim Čen Yna nie pierastanie być jadziernaj pahrozaj.