Minadukacyi znajšło parušeńni ŭ praviadzieńni alimpijady pa hieahrafii. Školniki mieli dostup da zadańniaŭ
Ministerstva adukacyi znajšło parušeńni ŭ praviadzieńni respublikanskaj alimpijady pa hieahrafii. Vinavatyja buduć zvolnienyja. Pra heta BiełTA paviedamili ŭ Minadukacyi.
Ministerstva vyvučyła infarmacyju pra parušeńni, dapuščanyja pry arhanizacyi respublikanskaj alimpijady pa hieahrafii.
«Pa vynikach razhladu nakiravanyja listy va ŭstanovy adukacyi i orhany kiravańnia adukacyjaj z patrabavańniem ab zvalnieńni asob, jakija majuć dačynieńnie da parušeńniaŭ praviłaŭ praviadzieńnia alimpijady», — prainfarmavali ŭ Minadukacyi.
Akramia taho, ministerstva źviarnułasia ź listom u Hienieralnuju prakuraturu z prośbaj dać pravavuju acenku dziejańniam vinavatych asob.
«Vyniki školnikaŭ, u dačynieńni da jakich ustanoŭleny fakty dostupu da alimpijadnych zadańniaŭ, anulavanyja. Na pazačarhovym pasiadžeńni žury pierahledzić śpis pieramožcaŭ zaklučnaha etapu respublikanskaj alimpijady», — dadali ŭ ministerstvie.
Zaraz pravodzicca analiz vynikovych materyjałaŭ respublikanskaj alimpijady pa ŭsich vučebnych pradmietach, a taksama ananimnaje ankietavańnie ŭsich jaje ŭdzielnikaŭ. Minadukacyi vyrašyła źmianić miechanizm padrychtoŭki i praviadzieńnia alimpijady.
Užo ŭ nastupnym navučalnym hodzie respublikanskaja alimpijada projdzie pa novych praviłach.