Epatažnaha «śviatara» z Navahradka asudzili za seks biez papiaredžańnia pra VIČ
Žychara Navahradku Dźmitryja Bondara, bolš viadomaha ŭ sacyjalnych sietkach jak «japiskap śvietu», asudzili na 1,5 hoda pazbaŭleńnia voli ŭ kalonii ahulnaha režymu. Prysud abviaścili ŭ sudzie Navahradzkaha rajonu 16 krasavika, paviedamlaje «Radyjo Svaboda».
U hety termin zaličać bolej za paŭhoda, što Bondar užo pravioŭ u SIZA.
Pra heta raskazała siabroŭka Dźmitryja Bondara Nina Paŭłoŭskaja.
Bondara pryznali vinavatym u «zaviedamym stvareńni dla inšaj asoby niebiaśpieki zaražeńnia virusam imunadeficytu čałavieka (VIČ)» (č. 1 art. 157 Kryminalnaha kodeksu), to bok u tym, što jon nie papiaredžvaŭ svaich seksualnych partneraŭ, što maje VIČ. Pa słovach maci i siabroŭ, Dźmitry pry pałavych kantaktach vykarystoŭvaŭ srodki abarony.
Viadoma, što piaciora čałaviek byli pryznanyja paciarpiełymi, ale ŭ sudzie jany zajavili, što nia majuć pretenzij da Bondara.
Dźmitry planuje abskardžvać prysud.
Spravu razhledzieli za 4 dni ŭ zakrytym režymie.
Da hetaha fihurant bolš za paŭhoda znachodziŭsia ŭ horadzienskim SIZA.
Pravaabaroncy ŭ sfery VIČ raniej prasili sud apraŭdać Bondara. Na ichnuju dumku, u dziejańniach mužčyny nie było viny.