Nastupiŭ na matuzki, upaŭ, z rota pajšła piena: 26-hadovy ŭdzielnik tydnia mody ŭ San-Paŭłu pamior na podyumie
Aściarožna, šakujučaje fota!
Fota z tvitara
Madel, što ŭdzielničaŭ ŭ Tydni mody ŭ brazilskim San-Paŭłu, 26-hadovy Tales Saares pamior paśla taho, jak upaŭ na podyumie padčas pakazu. Pra heta paviedamlaje Associated Press sa spasyłkaj na arhanizataraŭ mierapryjemstva (Sao Paulo Fashion Week, SPFW).
Rahel Patrasso / Xinhua
U zajavie SPFW, apublikavanaj u tvitary, havorycca, što Saaresu stała błaha padčas vychadu na podyum dla pakazu adzieńnia brenda Ocksa. Miedycynskaja kamanda pasprabavała akazać jamu dapamohu spačatku na podyumie, zatym dastaviła jaho ŭ špital. Tam miedyki kanstatavali śmierć madeli.
Inšyja padrabiaznaści ŭ zajavie nie pryvodziacca.
Miascovaje vydańnie Folha de S. Paulo paviedamlaje, što Saares nastupiŭ na matuzki i ŭpaŭ. Hledačy pieršapačatkova padumali, što padzieńnie było zapłanavana i źjaŭlałasia častkaj šou. Adnak zatym mužčynu pačało treści, z rota pajšła piena.
Padziei razharnulisia ŭ minułuju subotu, u apošni dzień modnych pakazaŭ 47-ha tydnia mody ŭ San-Paŭłu.
Vydańnie adznačaje, što padobny vypadak staŭ adnym ź niešmatlikich, kali nie pieršy, u historyi modnaj industryi, kali madel hinie na podyumie.