Makiej: Heta nie narmalna, kali ludzi čakajuć pa 10-15 hadzin na miažy, a to i sutki
Biełarusi i ES treba sieści za stoł pieramovaŭ i vyznačycca, jak spraścić prachodžańnie miažy. Pra heta zajaviŭ siońnia žurnalistam ministr zamiežnych spraŭ Uładzimir Makiej, paviedamlaje BiełTA.
«Heta adna z našych šmatlikich prapanoŭ, jakaja źviazana z palahčeńniem režymu prachodžańnia našaj sumiesnaj miažy ź Jeŭrapiejskim sajuzam. Što dla hetaha treba? Patrebna pierš za ŭsio hatoŭnaść abodvuch bakoŭ», - padkreśliŭ Uładzimir Makiej.
Jon adznačyŭ, što aznajomiŭsia z vodhukami na forumach adnosna hetaha pytańnia: chtości adznačaje prablemy ź biełaruskaha boku, ale pieravažnaja bolšaść vykazvajecca ab zatrymkach z boku jeŭrapiejskich susiedziaŭ. «Treba prosta sieści za stoł pieramovaŭ i vyznačycca, što nam treba dla taho, kab i pieravozčyki, i zvyčajnyja hramadzianie prachodzili hetuju miažu ŭ narmalnym režymie, kab nie było takoha, što ludzi čakajuć pa 10-15 hadzin, a to i sutki, asabliva kali heta prychodzicca na śviaty», — ličyć ministr.