Niahledziačy ni na što
Niezaležnaja rehijanalnaja hazieta «Borisovskije novosti» znajšła drukarniu i praciahvaje vychodzić.
Niezaležnaja rehijanalnaja hazieta «Borisovskije novosti» znajšła drukarniu i praciahvaje vychodzić.
U śniežni 2005 hodu niedziaržaŭnaja hramadska‑palityčnaja hazieta «Borisovskije novosti» razam ź inšymi niedziaržaŭnymi vydańniami była pazbaŭlenaja mahčymaści raspaŭsiudžvacca praz «Biełpoštu» i «Biełsajuzdruk». Situacyja dahetul nie vypraviłasia. U «Minabłsajuzdruk» vydaviec i redaktar «Borisovskich novostiej» Anatol Bukas źviartaŭsia ŭžo 6 razoŭ i ŭsio biezvynikova. Kolki hod tamu jon sudziŭsia z «Biełpoštaj». Admovy ŭ raspaŭsiudzie, atrymanyja redakcyjaj, znajomyja bolšaści niezaležnych vydańniaŭ. Zvarot u Barysaŭski RUPS plonu nie daŭ. Siońnia pa rajonie hazieta raspaŭsiudžvajecca ŭ banderolach. Praz prablemy z raspaŭsiudam skaraciŭsia i nakład vydańnia. Ciapier jon składaje 6500 asobnikaŭ.
Naprykancy minułaha hodu Barysaŭski rajvykankam pa rekamiendacyi padatkovaj inśpiekcyi skasavaŭ licenziju na razdrobny handal pieryjadyčnymi vydańniami ŭ pryvatnaha ŭnitarnaha pradpryjemstva «Bukas miedia‑cientr», jaki vydaje «Borisovskije novosti». Da vydaŭca maje pretenzii i padatkovaja inśpiekcyja. Vydaviec barysaŭskaj haziety nie pahadziŭsia ź dziejańniami miascovych uładaŭ i źviarnuŭsia ŭ Haspadarčy sud Minskaj vobłaści z patrabavańniem admianić rašeńnie vykankama ab anulavańni handlovaj licenzii. Papiaredniaje pasiedžańnie adbyłasia 22 studzienia, čarhovaje zapłanavanaje na 27 studzienia. Kali Haspadarčy sud pakinie rašeńnie papiaredniaj sudovaj instancyi ŭ sile, to redakcyja haziety stracić bolš za 100 miljonaŭ rubloŭ. A heta faktyčna aznačaje bankructva pradpryjemstva i trata pracy dla supracoŭnikaŭ redakcyi, zaznačyŭ sp. Bukas.
Novaja prablema napatkała ŭ pačatku hodu. Spasłaŭšysia na ekanamičnyja prablemy, pryvatnaja drukarnia «Płutas‑Markiet» 9 studzienia skasavała damovu z redakcyjaj na druk.
«Naša hazieta vychodzić ŭžo 17 hadoŭ, heta najstarejšy štotydniovik krainy. I za hety čas my zaŭsiody znachodzili sposab, kab dajści da čytača»— kaža hałoŭny redaktar Anatol Bukas. Pa jaho słovach, redakcyja i ŭ hetaj składanaj situacyi znajšła vyjście, i hazieta praciahvaje drukavacca.