Źjaviłasia VIDEA, jak homielskaja milicyja žorstka załamała dziadulu. UUS: «Heta teatr adnaho akciora!»
Vidavočcy źniali na videa zatrymańnie pažyłoha mužčyny ŭ Homieli. Bačna, jak jon sprabuje źbiehčy ad milicyi z krykami, što nikudy nie pajedzie. Ale ž supracoŭniki ŭsio ž załomvajuć mužčynu i adziavajuć na jaho kajdanki.
Spačatku ŭ ciecivie źjaviłasia viersija, što 67-hadovaha mužčynu tak žorstka zatrymlivali nibyta tolki za toje, što jon nie paśpieŭ pierajści darohu na zialonaje śviatło.
Ale milicyja Homiela prakamientavała videa, nazvaŭšy pavodziny mužčyny «teatram adnaho akciora».
«18 červienia, prajechaŭšy rehulavanaje skryžavańnie, inśpiektar ubačyŭ mužčynu z kalaskaj, jaki pierachodziŭ prajeznuju častku ŭ nienaležnym miescy. Pra jaki zialony sihnał moža iści havorka, kali da najbližejšaha śviatłafora bolš za 70 mietraŭ. Jon pierasiek pałosy ruchu aŭtatranspartu i stajaŭ na krai raździalalnaj pałasy, adrazu za aharodžaj, — paviedamili milicyjanty. —
Słužbovaja mašyna spyniłasia, i inśpiektar paśpiašaŭsia da mužčyny, jaki realna moh stać pryčynaj DTZ. Spyniŭšy intensiŭny patok transpartu, milicyjant pravodziŭ piešachoda nazad na tratuar.
Inśpiektary karektna i nieadnarazova prasili parušalnika prajści ŭ słužbovy aŭtamabil, kab razabrać situacyju z parušeńniem PDR. Ale mužčyna pavioŭ siabie nieadekvatna. Staŭ mocna kryčać, admaŭlać fakt parušeńnia. U rešcie rešt jon pabieh da tralejbusa.
Supracoŭniki DAI dahnali i zatrymali pravaparušalnika, užyŭšy fizičnuju siłu i śpiecyjalnyja srodki, dastavili jaho ŭ najbližejšaje adździaleńnie milicyi».
Taksama milicyja padkreśliła, što 67-hadovy žychar Dobrušskaha rajona maje za śpinoj šerah sudzimaściaŭ, u tym liku za złosnaje chulihanstva, abrazu i pahrozu zabojstvam. Akramia taho, jon nieadnarazova pryciahvaŭsia za ŭčynieńnie administracyjnych pravaparušeńniaŭ. U hetym śpisie - drobnaje chulihanstva, niepadparadkavańnie zakonnamu patrabavańniu supracoŭnika orhanaŭ unutranych spraŭ i dvojčy pierachod prajeznaj častki ŭ nieŭstanoŭlenym miescy.
U hety raz na parušalnika znoŭ skłali administracyjnyja pratakoły za pierachod prajeznaj častki ŭ nieŭstanoŭlenym miescy i niepadparadkavańnie zakonnamu patrabavańniu supracoŭnika milicyi.