«Maci 328» sustrelisia z Kačanavaj
10 lipienia čatyry aktyvistki ruchu «Maci 328» sustrelisia z kiraŭnicaj administracyi Alaksandra Łukašenki Natallaj Kačanavaj. Razmova ab prablemach źniavolenych pa antynarkatyčnym artykule ciahnułasia bolš za hadzinu, piša «Radyjo Svaboda».
Što paabiacała Natalla Kačanava «Maci 328»?
- Vyvučyć i, mahčyma, pierahledzieć bolš jak 100 kryminalnych spraŭ pa 328 artykule, prysudy pa jakich aktyvistki ličać niespraviadlivymi. U tym liku budzie vyvučana bolš za 20 spraŭ pa 4 častcy artykuła 328, jakuju maci asudžanych za raspaŭsiud narkotykaŭ ličać «samaj prablemnaj» i damahajucca jaje admieny ci źmienaŭ u jaje ŭžyvańni.
- Pravieści ŭ administracyi Alaksandra Łukašenki naradu z udziełam kiraŭnikoŭ pravaachoŭnych ustanoŭ i Viarchoŭnaha sudu, na jakoj buduć praanalizavanyja prablemnyja pytańni baraćby z narkotykami i prapanovy aktyvistak ruchu «Maci 328». Kačanava skazała, što takaja narada projdzie da kanca lipienia.
- Zładzić pravierku bankaŭ, praź jakija praciahvajucca hrašovyja aperacyi, źviazanyja z abarotam narkotykaŭ.
- Vyvučyć mahčymaść uklučeńnia asudžanych pa 1, 2, 3 i 4 častkach artykuła 328 u lik viaźniaŭ, na jakich budzie raspaŭsiudžanaja budučaja amnistyja da 75-hodździa pieramohi ŭ Vialikaj Ajčynnaj vajnie.
Čaho nie paabiacała Natalla Kačanava aktyvistkam «Maci 328»
«Skazała, što nia moža arhanizavać sustreču z Alaksandram Łukašenkam. Heta było naša asnoŭnaje patrabavańnie, ale jaho vyrašyć nie ŭdałosia. Kačanava pryznałasia, što sama bačycca z Łukašenkam zredku, kantaktuje ŭ asnoŭnym praz telefon. Ale skazała, što ŭsie našy patrabavańni zanatavanyja i buduć pieradadzienyja kiraŭniku dziaržavy. Šmat abmiarkoŭvali pytańni viartańnia ŭ hramadztva tych, chto adbyŭ pakarańnie pa artykule 328, i tut Kačanava zaprasiła da supracoŭnictva ź dziaržaŭnymi arhanizacyjami, u tym liku z namieśnicaj staršyni Savietu Respubliki Marjanaj Ščotkinaj. My tolki za», — kaža lider «Maci 328» Łarysa Žyhar.
Pavodle Łarysy Žyhar, Natalla Kačanava viedaje pra ich sustreču ź ministram unutranych spraŭ Juryjem Karajevym i skazała, što ŭsie abiacańni, jakija daŭ «Maci 328» novy ministar MUS, u jaje na kantroli.