Paśla pierapisu nasielnictva mohuć źmianić administracyjna-terytaryjalny padzieł Biełarusi
Paśla pierapisu nasielnictva administracyjna-terytaryjalny padzieł Biełarusi moža być pierahledžany. Ab hetym paviedamiŭ siońnia žurnalistam ministr ekanomiki Biełarusi Dźmitryj Kruty na VI Forumie rehijonaŭ Biełarusi i Rasii, pieradaje karespandent BiełTA.
«Ź minułaha hoda ŭ krainie vielmi surjozna pačała padymacca tema našaha rehijanalnaha raźvićcia. Parłamientaryi atrymali zadańnie, pakul papiaredniaje, razhledzieć až da administracyjna-terytaryjalnaha padziełu respubliki, jaki apošni raz byŭ zafiksavany ŭ 1960-ja hady i siońnia z ulikam raźvićcia, urbanizacyi, demahrafii, mihracyi, zrazumieła, maje patrebu ŭ peŭnych karekciroŭkach. Tut my ŭ pieršuju čarhu čakajem vynikaŭ pierapisu nasielnictva, jaki adbudziecca ŭ kancy hoda», — skazaŭ Dźmitryj Kruty.
U pytańni rehijanalnaha raźvićcia asablivaja ŭvaha budzie nadadziena haradam z nasielnictvam bolš za 80 tys. čałaviek. «My pavinny prapanavać asablivy prefierencyjny pakiet, pahladzieć, jak hetyja terytoryi buduć raźvivacca», — adznačyŭ kiraŭnik viedamstva.
Ministerstva ekanomiki, pavodle jaho słoŭ, taksama ciesna pracuje z rajonami ź ciažkim sacyjalna-ekanamičnym stanoviščam. «Orša ŭ nas piłot — jość ukaz, jość prahrama. My vielmi ŭvažliva ŭsio heta štomiesiac manitorym, i niedzie vosieńniu ŭ prezidenta adbudziecca vialikaja narada pa razhladzie hetych pytańniaŭ. Takich terytoryj pa mietodykach i pakazčykach u nas vydzielena kala tryccaci, tamu my budziem hladzieć, što dla ich možna prapanavać», — zaŭvažyŭ Dźmitryj Kruty.
Jon raskazaŭ, što ŭ Biełarusi vyvučali dośvied inšych krain pa raźvićci nievialikich haradoŭ — niama ŭniviersalnaha recepta, kožnaja dziaržava idzie svaim šlacham. «My vyvučali dośvied krain Jeŭrasajuza: Vialikabrytanii, Hiermanii, skandynaŭskich krain. Kožnaja kraina pa-svojmu vyrašaje prablemu terytoryj, dzie ekanamičnaje raźvićcio adstaje ad siaredniaha», — skazaŭ ministr.