U centry Minska prajšła honka pa tryjatłonie FOTY
Bolš za 1000 čałaviek z 11 krain śvietu pieraadoleli maršrut Alfa-Bank Minsk Triathlon. Padčas spabornictvaŭ taksama byli sabranyja hrošy ŭ dapamohu dzieciam z aŭtyzmam.
Honka raściahnułasia amal na 60 km. Spačatku ŭdzielniki płyli praź Minskaje mora, potym jechali na rovary da centra Minska i dalej biehli da finišu. U paraŭnańni ź minułym hodam dystancyju pavialičyli ŭdvaja — z 1/8 da 1/4 Ironman. Upłaŭ pryjšłosia pieraadoleć 950 m, kruciačy piedali — 45 km, a biahom — 10,5 km. Dla tych, chto byŭ nie hatovy da takich surjoznych vyprabavańniaŭ, praduhledzieli ŭdvaja karaciejšy maršrut.
Turnir akazaŭsia masavym: u im uziali ŭdzieł bolš za 800 darosłych biehunoŭ i kala 200 dziaciej. Bolš za ŭsio na trasie było biełarusaŭ, ukraincaŭ i rasijan. Pryjechali taksama atlety z Danii, Estonii, Polščy, Čechii i Bielhii. U Minsk prylacieli navat spartoŭcy ź Jehipta, Izraila i ZŠA.
Honka ŭpieršyniu dabrałasia da centra Minska. Paśla chutkasnaha zapłyvu ŭ Centry parusnaha sportu ŭdzielniki prajechali na rovary pa praśpiekcie Pieramožcaŭ, a kala Pałaca sportu pierajšli na bieh, pieraadoleŭšy apošni adrezak uzdoŭž Śvisłačy. Dziela turniru na niekalki hadzin pierakryli centralnyja vulicy.
Čempijonam na dystancyi 1/4 Ironman staŭ biełarus Alaksandr Vasilevič z kłuba «Alfa-Banka», jaki prajšoŭ trasu za 1 hadzinu 50 chvilin. U trojku taksama ŭvajšli dva atlety z Rasii — Dzianis Vasiljeŭ i Mikałaj Jarašenka. Najlepšaj siarod dziaŭčat akazałasia minčanka Hanna Maksimava, jakaja pieraadoleła maršrut biez małoha za 2 hadziny 8 chvilin.
Pieršaje miesca ŭ katehoryi 1/8 Ironman zaniaŭ biełarus Cichan Ščamialoŭ, jaki asiliŭ dystancyju za 1 hadzinu 2 chviliny. Siarod dziaŭčat najchutčejšaj była taksama biełaruska Taćciana Łukša, jakaja prajšła honku za 1 hadzinu 8 chvilin. Usie ŭdzielniki, niezaležna ad vynikaŭ, na finišy atrymali miedali.
Padčas turniru taksama prajšła dziciačaja honka TriKids. Chłopčyki ad 6 da 10 hadoŭ pieraadoleli adrezak u 500 m, a školniki ad 11 da 13 hadoŭ prapłyli 100 m i prabiehli 1 km. Siarod junych udzielnikaŭ byli i dzieci z aŭtyzmam: na praciahu navučalnaha hoda ich vučyli płavać i rychtavali da «žaleznaj» honki. Kiraŭnikom inkluziŭnaha prajekta i hałoŭnym trenieram vystupiła dvuchrazovaja alimpijskaja pryziorka Alaksandra Hierasimienia.
Sacyjalnaj misijaj turnira staŭ zbor srodkaŭ na padrychtoŭku śpiecyjalistaŭ dla pracy z asablivymi dziećmi. Hrošy nieŭzabavie buduć pieradadzienyja MDHA «Dzieci. Aŭtyzm. Baćki».
Alfa-Bank Minsk Triathlon prajšoŭ u Minsku ŭ druhi raz. Arhanizatarami vystupili «Kłub tryjatłona «Trystajł» i «Alfa-Bank», a padtrymku akazali Minharvykankam, Minabłvykankam i Ministerstva sportu i turyzmu. Tryjatłon jak vid sportu prydumali francuzy jašče ŭ pačatku 20-ha stahodździa. Najbolš papularnym jon staŭ u pačatku nulavych, kali byŭ uklučany ŭ alimpijskuju prahramu. U apošnija hady tryjatłon atrymaŭ šyrokaje raźvićcio ŭ Biełarusi.