Pryčynaj śmierci elity rasijskaha fłota na «Łašaryku» staŭ vybuch rasijskaj batarei, jakoj zamianili ŭkrainskuju
Ekipaž atamnaj hłybakavodnaj stancyi AS-31 («Łašaryk») moh evakujavacca na łodku-nośbit, ale paličyŭ za lepšaje dziejničać u dakładnaj adpaviednaści z «Kiraŭnictvam pa baraćbie za žyvučaść» aparata. Pra heta piša «Kommiersant» sa spasyłkaj na krynicy, blizkija da rasśledavańnia zdareńnia, publikujučy novyja padrabiaznaści katastrofy.
Pa dadzienych vydańnia, trahičnyja padziei na «Łašaryku» pačali raźvivacca padčas stykoŭki stancyi z łodkaj-nośbitam. Mienavita tady na borcie AS-31 u akumulatarnym adsieku źjaviŭsia dym. Surazmoŭcy adznačajuć, što pažaru ŭ zvykłym sensie hetaha słova na padłodkach nie byvaje, pakolki jany zrobleny ź nieharučych materyjałaŭ. U hetaj suviazi luby dym na padłodkach abjaŭlajecca pažaram, a padvodnikam davodzicca zmahacca ź im praktyčna navobmacak.
U jakaści pryčyny źjaŭleńnia pažaru nazyvajuć mahčymyja prablemy ŭ elektrasistemach AS-31, jakaja vykarystoŭvaje toki siłaj da 1000 ampier, albo nievialiki defiekt kabielaŭ, jaki moh pryvieści da ich razahrevu z nastupnym apłaŭleńniem izalacyi.
Krynicy adznačajuć, što avaryja na pačatkovaj stadyi nie ŭjaŭlała vialikaj niebiaśpieki dla ekipaža. Usie jany mahli evakujavacca praz šluzavuju pryładu na łodku-nośbit, u kožnaha ź ich było pry sabie partatyŭnaja dychalnaja pryłada PDP-3, jakaja dazvalaje pratrymacca nie mienš za 20 chvilin biez kisłarodu. Adnak, jak piša vydańnie, «Kiravańnie pa baraćbie za žyvučaść padvodnych łodak», jakoje dziejničaje ŭ Vajenna-marskim fłocie, zahadvaje kožnamu členu ekipaža zastavacca ŭ tym adsieku, dzie jaho zastaŭ pažar, i zmahacca z avaryjnaj situacyjaj na svaim miescy. Pakidańnie pałajučaha adsieka biez zahadu ciahnie za saboj kryminalnuju adkaznaść.
Padziei, pa dadzienych vydańnia, raźvivalisia nastupnym čynam: kamandziru paviedamili, što ŭ akumulatarnym adsieku źjaviŭsia dym, toj dałažyŭ kamandziru padvodnaj łodki-nośbita, što na borcie AS-31 pažar, zahadaŭ pravieryć dychalnyja aparaty i pierajści na nośbit usim, chto nie budzie zadziejničany u baraćbie za žyvučaść.
U vyniku bort AS-31 pakinuli šeść čałaviek, a dziesiać aficeraŭ-hidranaŭtaŭ zastalisia na stancyi, praciahnuŭšy baraćbu za žyvučaść karabla. Paźniej ahlad dastaŭlenaha na bazu AS-31 pakazaŭ, što ŭ baraćbie za jaje žyvučaść hidranaŭty patracili ŭsie srodki pažaratušeńnia, jakija byli na borcie. U pryvatnaści, pustymi apynulisia vohnietušycieli, bałony pienahienierujučaj ŭstanoŭki, a taksama ŭsie čatyry stolitrovyja jomistaści z freonam sistemy ŁACH (łodkavaja, abjomnaja, chimičnaja). Akramia taho, praz 40 chvilin pracy padvodniki, jak kažuć surazmoŭcy vydańnia, «vydychali» ŭsie izalavalnyja dychalnyja srodki. Paśla hetaha jany ŭklučylisia ŭ šłanhavyja dychalnyja aparaty, jakija padajuć pavietra z bałonaŭ pavietra vysokaha cisku.
Paśla taho jak niekatoryja padvodniki pačali hublać prytomnaść, kamandzir AS-31 zapytaŭ u kamandzira łodki-nośbita dazvołu evakujavacca na nośbit. Kab dapamahčy im padniacca z AS-31 u nośbit, u šluzavaj pryładzie ich sustrakali čaćviora hidranaŭtaŭ z druhoha ekipaža. U momant padrychtoŭki ekipaža da evakuacyi adbyŭsia vybuch, jaki i zabraŭ žyćci ŭsich čatyrnaccaci marakoŭ. Paźniej ekśpierty ŭstanavili, što vybuchnuła akumulatarnaja batareja.
I tut jašče adzin tonki momant. Vybuchnuła rasijskaja lityj-ijonnaja batareja, na jakija Rasija stała pierachodzić paśla 2014 hoda, kali admoviłasia ad nadziejnych srebra-cynkavych, jakija vyrablalisia va Ukrainie.