Mužčyna pakinuŭ pasynka ŭ mašynie i pajšoŭ u hryby. A chłopčyk źnik
U Žłobinskim rajonie ajčym pakinuŭ 6-hadovaha chłopčyka ŭ mašynie, a sam pajšoŭ u les u hryby. Kali mužčyna viarnuŭsia, u sałonie aŭto było pusta, paviedamlaje homielskaja abłasnaja milicyja.
Mužčyna raspavioŭ milicyi, što ŭ lesie zhubiŭsia jaho pasynak. Na miesca zdareńnia nieadkładna vyjechali čatyry milicejskija narady. Pra incydent paviedamili ŭ MNS i miascovamu ŭčastkovamu, jaki padklučyŭ i leśnikoŭ.
Vyśvietliłasia, što mama była na pracy, a ajčym vyrašyŭ pajści ŭ hryby, uziaŭšy z saboj pasynka. Chłopčyk nie zachacieŭ iści ŭ les i zastaŭsia ŭ mašynie z telefonam u rukach. Praź piać chvilin mužčyna viarnuŭsia da aŭto, ale ŭ mašynie nikoha nie było. Mabilnik lažaŭ na zadnim siadzieńni.
Jak raspavioŭ namieśnik načalnika kryminalnaha vyšuku UUS abłvykankama Jaŭhien Bobryk, milicyja tarmaziła ŭvieś sustrečny transpart, ale vynikaŭ heta nie davała. Nieŭzabavie milicejskaja mašyna paviarnuła na prasiołkavuju darohu. Nasustrač im ruchałasia mašyna. Kali aŭto padjechała bližej, ź jaho vyskačyŭ kiroŭca i raspavioŭ milicyjantam, što jon padabraŭ na darozie chłopčyka, jaki zhubiŭsia. Kiroŭca prapanavaŭ dziciaci svaju dapamohu ŭ pošuku baćkoŭ. Darečy, mały paśpieŭ prajści 2 km ad mašyny, na jakoj pryjechaŭ z ajčymam.
Načalnik AUS Žłobinskaha rajvykankama Hienadź Mielnik pravioŭ z ajčymam hutarku, patłumačyŭšy mahčymyja nastupstvy hetaha incydentu.