Padličyli, kolki minčukoŭ apłačvajuć prajezd u tramvai bankaŭskaj kartaj
Žychary Minska kožny dzień apłačvajuć bankaŭskaj kartaj kala 1000 pajezdak u tramvai. Takuju infarmacyju sabraŭ BPS-Śbierbank padčas piłotnaha prajekta na minskim maršrucie №6, jaki kursiruje pamiž Sierabrankaj i Zialonym Łuham. Bank užo hatovy maštabavać technałohiju na ŭvieś naziemny transpart u Minsku.
Popyt na apłatu prajezdu kartkaj raście štomiesiac z apiaredžańniem prahnoznych pakazčykaŭ prajekta. Technałohiju zapuścili ŭ kancy traŭnia, i z taho času niepasredna ŭ tramvai kartkaj i smartfonam byli apłačanyja 50 tysiač pajezdak. U lipieni aktyŭnaść pasažyraŭ vyrasła na 8%.
«Technałohija akazałasia vielmi papularnaj. I choć my jašče nie zaviaršyli piłotny etap prajekta, užo jasna, što jon zapatrabavany pasažyrami. Kožny dzień raście kolkaść tych, chto karystajecca mahčymaściu zručnaj apłaty prajezdu ŭ tramvai. Siarod ich jość i zamiežniki z kartkami, vypuščanymi za miažoj. Padčas praviadzieńnia Jeŭrapiejskich hulniaŭ my zafiksavali rost kolkaści tranzakcyj pa kartkach zamiežnych bankaŭ amal na 30%, — adznačyła vykanaŭčy dyrektar BPS-Śbierbanka Maryna Asipoŭskaja. — Siońnia bank hatovy da poŭnafarmatnaha pašyreńnia prajekta na ŭvieś naziemny transpart Minska».
Bieskantaktavymi kartkami zaraz možna raźličvacca va ŭsich tramvajach šostaha maršrutu. U budučyni technałohiju płanujecca maštabavać na ŭvieś naziemny transpart Minska. Servis zapracuje nie tolki ŭ astatnich maršrutach tramvaja, ale i ŭ aŭtobusach i tralejbusach.
Servis źjaŭlajecca «adkrytym». Jon padtrymlivaje kartki luboha banka i «siabruje» z tryma apłatnymi sistemami: Visa, Mastercard i Biełkart-Maestro ź bieskantaktavym interfiejsam. Taksama možna raźličvacca ŭ tramvai z dapamohaj smartfona, birulki, hadzińnika i inšych pryład z padtrymkaj technałohii NFC.
Dla apłaty treba padnieści kartku da validatora, zamacavanaha na poručni, dačakacca hukavoha sihnału i tekstavaha paviedamleńnia. Košt prajezdu — 60 kapiejek, što anałahična koštu papiarovaha tałona. Vyvučyć historyju pajezdak i raschodaŭ možna ŭ asabistym kabiniecie pasažyra na sajcie sistemy Paybycard. Tam ža možna ŭdakładnić status bankaŭskaj karty i atrymać elektronny kart-rachunak.
Technałohija taksama paśpiachova pracuje ŭ minskim mietro i ciahnikach haradskich linij Biełaruskaj čyhunki. Ahułam na ŭsich vidach hramadskaha transpartu tolki ŭ červieni bankaŭskimi kartkami raźličylisia bolš za 1,5 młn razoŭ. Piłotny prajekt na naziemnym transparcie BPS-Śbierbank realizuje razam z HP «Minsktrans» i IBA Group.