Pamior brytanski palittechnołah Cim Beł, jaki palapšaŭ imidž Łukašenki
U niadzielu va ŭzroście 77 hadoŭ pamior viadomy brytanski palittechnołah łord Cim Beł, jaki pracavaŭ z Marharet Tetčer u 1979, 1983 i 1987 hadach, a taksama zajmaŭsia palapšeńniem imidžu Łukašenki ŭ 2008-2009 hadach. Taksama łord Beł u roznyja hady kansultavaŭ Barysa Jelcyna i Barysa Bierazoŭskaha. Pra śmierć łorda Beła paśla niepraciahłaj chvaroby paviedamiła jaho siamja.
Cim Beł naradziŭsia 18 kastryčnika 1941 hoda. U 1960-ja jon pracavaŭ u rekłamnych i PR-firmach, a ŭ 1970 hodzie ŭdzielničaŭ u zasnavańni rekłamnaha ahienctva Saatchi & Saatchi, kirujučym dyrektaram jakoha byŭ doŭhija hady. Staŭšy hałoŭnym daradcam pa imidžy i pieradvybarčaj kampanii Marharet Tetčer. Łord Beł supracoŭničaŭ z Kansiervatyŭnaj partyjaj i padčas vybaraŭ 1983 i 1987 hadoŭ. Kali Marharet Tetčer była premjer-ministram, Cim Beł byŭ uźviedzieny ŭ rycary.
U 1987 hodzie Cim Beł zasnavaŭ PR-firmu Bell Communications, jakaja z 1997 hoda stała kampanijaj Bell Pottinger. Kampanija akazvała pasłuhi samym nieadnaznačnym klijentam, u tym liku Aŭhusta Pinačetu, Alaksandru Łukašenku, karaleŭskaj siamji Saudaŭskaj Aravii i hetak dalej. Firma zakryłasia dva hady tamu paśla skandału z rasisckaj kampanijaj u Paŭdniovaj Afrycy.
Łord Beł i Biełaruś
U śniežni 2012-ha ŭ internecie źjaviłasia spravazdača kampanii łorda Beła Chime Communications ź Vialikaj Brytanii ab pracy dla palapšeńnia imidžu Biełarusi na mižnarodnaj arenie ŭ 2008—2009 hadach. Ź biełaruskaha biudžetu za hety pijar miełasia być zapłačana 10 miljonaŭ jeŭra.
Kantrakt biełaruskaha ŭradu z łordam Bełam dziejničaŭ adzin hod. Jon byŭ padpisany ŭ lipieni 2008 hodu, a 16 žniŭnia z turmy byŭ vyzvaleny eks-kandydat na vybarach prezidenta Alaksandar Kazulin. Vyzvaleńnie palitviaźniaŭ łord Beł nazvaŭ adnoj z pryčynaŭ tahačasnaha palapšeńnia imidžu Biełarusi i źniaćcia niekatorych mižnarodnych sankcyj.
Raniej łord Beł pryznaŭ, što PR-kampanija Bell Pottinger Group, jakaja ŭ 2008—2009 hh. pracavała dla palapšeńnia imidžu Biełarusi i Alaksandra Łukašenki na Zachadzie, atrymlivała hanarary vyklučna ad uradu Biełarusi.