«Novaja hazieta» znajšła dokazy prysutnaści čačenskaha śpiecnaza ŭ Narviehii
Padraździaleńnie parašutystaŭ čačenskaha śpiecnaza «Latučy atrad» z 2016 hoda pracuje ŭ narviežskaj častcy Arktyki na archipiełahu Špicbierhien, paviedamlaje rasijskaja «Novaja hazieta». Jana praanalizavała danyja ź instahramaŭ mierkavanych śpiecnazaŭcaŭ.
Vydańnie pryvodzić niekalki zdymkaŭ karystalnika akhaev_07_95. Na adnym ź ich mužčyna źniaty na fonie avijazapraŭščyka z nadpisam «Svalbard lufthavn» («aeraport Špicbierhiena»). Fota maje hieateh «Spitsbergen». Na ŭniformie mužčyny bačnaja našyŭka parašutnaha centra DZ Grozny. Zdymak zrobleny ŭ lutym 2018 hoda.
Na inšaj fatahrafii, jakaja datavana studzieniem 2018-ha, akhaev_07_95 znachodzicca na fonie ściaha taho ž parašutnaha centra. U rukach u jaho zbroja. Hieateh — «Longyerbyen» aznačaje horad Łonhijr, stalicu narviežskaj častki Špicbierhiena.
Vydańnie taksama spasyłajecca na fota karystalnika bes___600. Jano zroblena ŭ sakaviku 2018 hoda, na im mužčyny ŭ vajskovaj formie stajać na fonie hroźnienskaha aeraporta. U kamientarach aŭtar napisaŭ: «Lichi 16 hod… Na Arktyku vylatali». Na pytańnie pra tavaryša, što adsutničaŭ, jon adkazaŭ: «Jany ŭ Narviehiju jeździli tady. Pa pracy jeździli».
Raniej narviežskaje vydańnie AldriMer paviedamiła pra vysadku rasijskich śpiecpadraździaleńniaŭ na Špicbierhien i macierykovuju Narviehiju dla praviadzieńnia vajennych apieracyj i raźviedki. Pasolstva Rasii ŭ Narviehii nazvała hetuju infarmacyju «hrubaj pravakacyjaj».