Da 30 jeŭra za miesca: «Biełavija» raskazała, kolki budzie kaštavać vybar kresła
Z 3 kastryčnika avijakampanija «Biełavija» prapanuje pasažyram skarystacca pasłuhaj papiaredniaha vybaru miesca ŭ sałonie samalota na sajcie avijakampanii padčas abo paśla kupli bileta, paviedamlaje aficyjny sajt kampanii.
U testavym režymie dadzienaja pasłuha budzie dastupnaja na rehularnych rejsach u/z Ałmaty, Nur-Sułtan, Ašchabad, Baku, Barsiełona, Batumi, Jerevan, Ženieva, Łarnaka, Łondan, Paryž, Tbilisi.
«Servis papiaredniaha vybaru miescaŭ, jaki vykarystoŭvaje bolšaść zamiežnych avijakampanij, dazvolić pasažyram zahadzia zabraniravać miescy z pavialičanaj adlehłaściu pamiž radami kresłaŭ (naprykład, šerahi kala avaryjnych vychadaŭ i pieršyja šerahi ekanom-kłasa), jakija raniej nie byli dastupnyja dla anłajn-braniravańnia. Nieabchodna adznačyć, što heta novaja pasłuha, jakaja budzie pradastaŭlacca dadatkova da ŭžo najaŭnaj mahčymaści biaspłatnaha vybaru miesca ŭ pracesie anłajn rehistracyi na sajcie avijakampanii.
Na dadzieny momant dadatkovaja pasłuha zapuščana ŭ testavym režymie, adnak užo ŭ chutkim časie našy pasažyry zmohuć vybirać miesca na ŭsich rejsach avijakampanii.
Košt dadatkovaj pasłuhi varjirujecca ad raźmiaščeńnia ŭ sałonie samalota ad 5 da 30 jeŭra. Dla ŭdzielnikaŭ prahramy «Biełavija» Lidar załatoha ŭzroŭniu i pasažyraŭ biznes-kłasa pasłuha biaspłatnaja. U vypadku techničnaj niemahčymaści pradastavić miesca apłočanaj katehoryi, avijakampanija pakryje poŭny košt pasłuhi.
U kampanii źviartajuć uvahu, što pasłuha vybaru miescy budzie aktyŭnaja da 24 hadzin da vyletu rejsa. Paśla paznačanaha času ŭsie miescy, što zastalisia, stanoviacca dastupnyja dla rehistracyi biaspłatna, za vyklučeńniem miescaŭ z pavialičanaj adlehłaściu pamiž radami kresłaŭ, a taksama miescaŭ u pačatku sałona ekanamičnaha kłasa. Dla dadzienych miescaŭ mahčymaść skarystacca płatnym vybaram zastajecca da 3-ch hadzin da vyletu rejsa. Niepradadzienyja miescy nazvanych katehoryj buduć dastupnyja dla rehistracyi na stojcy ŭ aeraporcie biaspłatna.