Kot u Rasii byŭ narkakurjeram, jaho zatrymali ŭ jakaści rečavaha dokazu, ale jon zdoleŭ źbiehčy
Śledstva pa spravie ab dastaŭcy narkotykaŭ u Tulskuju vypraŭlenčuju kałoniju №6 (VK-6) zhubiła hałoŭny rečavy dokaz — kata, pry dapamozie jakoha dastaŭlalisia zabaronienyja rečyvy. Historyju apisaŭ «Kamiersant».
Śledčyja źmiaścili žyviołu ŭ zoakutok «na adkaznaje zachoŭvańnie», adnak kot źbieh adtul. Abarona hałoŭnaha fihuranta spravy, Eduarda Dołhincava, ličyć, što strata kata pazbaŭlaje advakataŭ mahčymaści pravieści śledčy ekśpierymient i pravieryć, ci sapraŭdy žyvioła mahła pieranosić narkotyki.
Jak zajaviŭ advakat Dźmitryj Sotnikaŭ, adkaznych za zachoŭvańnie kata nieabchodna pakarać, a samu spravu — zakryć z-za straty mierkavanaj pryłady złačynstva.
Asudžany VK-6 Dołhincaŭ vyrašyŭ naładzić pastaŭki narkotykaŭ źniavolenym z-za miežaŭ papraŭčaj ustanovy. Dla hetaha abvinavačany vyrašyŭ vykarystoŭvać narodžanaha ŭ kałonii kata, jaki časam pakidaŭ jaje terytoryju praź nievialiki łaz.
Jak ličyć abvinavačvańnie, u lipieni 2018 hoda znajomy Dołhincava nadzieŭ na kata ašyjnik z tajemnaj kišeńkaj i pakłaŭ tudy skrutak z narkotykami. Adnak płan nie spracavaŭ - mužčynu zatrymali, kot, pryznany rečdokam «šera-bieła-čornaha koleru», byŭ adpraŭleny na pieratrymku ŭ miascovy zoakutok, a asudžany Dołhincaŭ pajšoŭ pad sud. Pazicyja abvinavačvańni budujecca na pakazańni troch sakretnych śviedak, jakija zajavili, što zakazvali ŭ abvinavačanaha narkotyki i mohuć apaznać kata-narkakurjera.