ŚMI: Infarmatar, jaki vydaŭ al-Bahdadzi, atrymaje $25 młn
Vyśvietlić miescaznachodžańnie vierchavoda «Isłamskaj dziaržavy» ŭdałosia dziakujučy infarmataru ź jaho najbližejšaha atačeńnia, paviedamlaje Washington Post. Havorka idzie pra adnaho z aktyŭnych udzielnikaŭ ID, jaki kaardynavaŭ pieramiaščeńni Abu Bakra al-Bahdadzi pa Siryi i navat dapamahaŭ uładkavać jaho prytułak u pravincyi Idlib.
Pavodle vydańnia, pierabiežčyk daŭ amierykanskaj vyviedcy nie tolki źviestki pra toje, dzie mienavita chavajecca teraryst. Jon pieradaŭ i płan pakojaŭ u budynku, što było vielmi važna padčas šturmu.
Infarmatar byŭ nastolki blizki da al-Bahdadzi, što ŭ momant śpiecapieracyi znachodziŭsia ŭ hetym ža domie. Praz dva dni paśla šturmu jaho vyvieźli z krainy razam z usioj siamjoj.
Ciapier mužčyna moža raźličvać na $25 młn, jakija byli abiacany za hałavu al-Bahdadzi. Adnak miarkujecca, što dziejničaŭ jon nie tolki z-za hrošaj. Adna z krynic WP śćviardžaje, što havorka idzie pra araba, jaki vyrašyŭ adpomścić svajoj arhanizacyi za zabojstva adnaho sa svajakoŭ. Pieršapačatkova jon kantaktavaŭ z kurdami z «Siryjskich demakratyčnych sił», jakija paviedamili pra ahienta amierykancam. Tyja doŭhi čas praviarali, nakolki infarmatar praŭdzivy. A kali zrazumieli, što znajšli patrebnaha čałavieka, pačałasia padrychtoŭka da śpiecapieracyi.