Televiadučy Kryvašejeŭ vybačyŭsia za toje, što nazvaŭ syna Vaźniaka «bujnym». A toj prosta prachodziŭ reabilitacyju paśla DTZ
Žurnalist BT Andrej Kryvašejeŭ paprasiŭ u fejsbuku prabačeńnia ŭ adnaho ź lidaraŭ «Havary praŭdu» Siarhieja Vaźniaka.
U efiry «Panaramy» za 16 listapada Kryvašejeŭ pieraličyŭ miedycynskija dyjahnazy niekatorych naziralnikaŭ na parłamienckich vybarach.
Siarod inšaha, prahučała fraza: «Niechta Vaźniak — jašče adzin bujny paśla psichijatryčnaha lačeńnia». Havorka viałasia pra syna Siarhieja Vaźniaka.
«Vosiem hadoŭ tamu ŭ vyniku DTZ Aloša atrymaŭ ciažkuju čerapna-mazhavuju traŭmu. Dzieviać dzion znachodziŭsia ŭ komie. Pačaŭsia aciok hałaŭnoha mozhu. Na heta žudasna było hladzieć. Daktary kazali, što šancaŭ vyžyć u jaho niama, — napisaŭ Vaźniak u fejsbuku. —
Čytajcie pra toje zdareńnie. BMW u centry Minska ŭrezaŭsia ŭ aŭtobus: zahinuła dziaŭčyna
A jon vyžyŭ. Było doŭhaje lačeńnie i adnaŭleńnie. Miesiac reanimacyi. Miesiac niejrachirurhii. Miesiac u azdaraŭlenčym centry. Potym hady ambułatornaha lačeńnia.
My ŭsie razam — jon sam, biełaruskija daktary, usia naša siamja — viarnuli jaho da narmalnaha žyćcia (na fota — my ź im letam minułaha hoda katajemsia na rovarach).
Ja rastłumačyŭ [Kryvašejevu], što syn moj nijaki nie «bujny». U vyniku traŭmy ŭ jaho była zusim inšaja prablema — poŭnaja strata pamiaci. Nastolki poŭnaja, što niekalki miesiacaŭ jon nie paznavaŭ nas z Volhaj — svaich baćkoŭ».
Kryvašejeŭ prynios piersanalnyja prabačeńni Siarhieju Vaźniaku, a paśla napisaŭ i jaho synu.
U vyniku viadučy BT napisaŭ dopis, u jakim paprasiŭ prabačeńnia za zališniuju emacyjnaść u tekście siužetu, adnak zapeŭniŭ, što infarmacyja adpaviadaje rečaisnaści.