«Ja b uziaŭ vinu na siabie — nielha pakinuć čatyroch dačok biez mamy». Žurnalista Ihara Karnieja padazravali ŭ pravozie narkotykaŭ
Ihar i Ina Karniej — asoby viadomyja. Ihar — žurnalist, jaho žonka Ina — psichołah, arhanizatar kanfierencyj TEDx u Minsku. Ale jak stała viadoma, niekalki hadoŭ tamu Karniejam pahražaŭ bujny termin za kantrabandu narkotykaŭ.
Ihar i Ina Karniej.
Ihar Karniej raspavioŭ «Našaj Nivie», jak tak atrymałasia.
«U pačatku 2017 hoda my z žonkaj jeździli ŭ Ekvador. Naša dačka jakraz była tam vałancioram, my vyrašyli i pabačycca ź joj, i pahladzieć krainu. Praviali ŭ Ekvadory dva tydni, pierad viartańniem u Biełaruś nabyli suvieniry, sioje-toje ŭ miascovych kramach. I ŭ adnoj z kramaŭ nabyli miascovuju harbatu: zvyčajny pakunak, zapakavany fabryčnym sposabam. Na im byli niejkija nadpisy na ispanskaj, ale chto tam pryhladaŭsia: harbata i harbata, — uzhadvaje Ihar Karniej. — Pa viartańni ŭ Biełaruś na miažy ź Litvoj nas dahladali i znajšli tuju harbatu. I pačalisia prablemy.
Nas spynili prosta tamu, što ŭ pašpartach byli štampy Ekvadoru. Akazałasia, što na miažy amal zaŭsiody pilna dahladajuć tych, chto viartajecca z Łacinskaj Amieryki.
Pačali hladzieć našy rečy. Pravieryli z sabakam, usio było narmalna. Paśla pierabirali našy rečy. Znajšli tuju harbatu, jana vyklikała padazreńni.
U vyniku nas z žonkaj adpravili pad vartu, u izalatar u Voranavie. Usio, što my vieźli z Ekvadora — harbatu, rom, cukierki — adpravili na ekśpiertyzu. I ekśpiertyza pakazała, što ŭ harbacie prysutničajuć listy koki.
Paśla ŭžo ja daviedaŭsia, što kali nabyvaješ štości kštałtu harbaty ŭ krainach Łacinskaj Amieryki ci ŭ Kitai, treba praviarać skład praduktu. Ale ž tady ja hetaha nie viedaŭ. I harbata vyhladała jak zvyčajna: kubačak namalavany, pradajecca ŭ šarahovaj kramie…»
Karniej kaža, što pad vartaj jany z žonkaj praviali try dni:
«Siadzieli pa roznych kamierach. Žonka ŭvohule ŭvieś čas siadzieła adna. U mianie byli roznyja «susiedzi»: adzin chłopiec, zatrymany za chabar, druhoha padazravali ŭ kradziažy.
Praz try dni nas adpuścili pad padpisku.
Ale sprava zakruciłasia, usio išło da taho, što kahości adnaho z nas pasadziać. Ja ŭžo rychtavaŭsia brać vinu na siabie — u nas čatyry dački, nielha ž ich pakinuć kruhłymi sirotami».
Na toj momant pakarańnie pa antynarkatyčnym artykule 328 było jašče bolš žorstkim. Karniejaŭ mahli asudzić za pieramiaščeńnie praź miažu narkatyčnaha rečyva, jakoje ździejśniła hrupa asob. U 2017 hodzie za takoje karali terminam ad 8 da 15 hadoŭ.
«Čakałasia, što sud budzie praz dva miesiacy. Ale jany prajšli, ničoha nie adbyłosia, — uzhadvaje Ihar Karniej. — Vyśvietliłasia, što razhlad spravy adkładvajecca, bo śledčyja nakiravali zapyt u Ekvador: što za harbata, nakolki lehalny jaje prodaž. Adkazu adtul nie było bolš za hod. Kali jon narešcie pryjšoŭ, ja dakładna nie viedaju. Ale amal praz dva hady, u apošnija dni 2018 hoda śledčyja paviedamili, što našu spravu zakryli praz adsutnaść składu złačynstva».
Hetuju historyju ŭzhadała ŭ fejsbuku i žonka Ihara.
«Taki dośvied vielmi zrušvaje kropku adliku ŭsich bied. Žyvy? Na voli? Z usim astatnim možna spravicca», — napisała Ina Karniej.