Udavie Baradulina znoŭ źbirajuć hrošy. Navošta ciapier?
Paviedamleńni pra zbor hrošaj dla ŭdavy Ryhora Baradulina stali źjaŭlacca ŭ sacyjalnych sietkach. Apošni raz, u lipieni, dapamoha ŭdavie paeta była patrebna, kab apłacić zapazyčanaść za elektryčnaść. «Naša Niva» daviedałasia, što stałasia pryčynaj ciapier.
Žurnalist Hleb Łabadzienka, blizki da siamji Baradulina, patłumačyŭ, što da ciapierašniaha zboru nie maje dačynieńnia. Ale vykazaŭ zdahadku, što hrošy Valancinie Michajłaŭnie mohuć spatrebicca ŭ suviazi z pachavańniem dački (Iłona Baradulina, jakaja doŭhi čas žyła ŭ Izraili, pamierła 8 śniežnia ad ankałohii).
«Usie hetyja pracedury ŭ Izraili strašna darahija. Nakolki ja viedaju, siabry siamji źviarnulisia zaraz u biełaruskuju ambasadu z prośbaj dapamahčy, bo viadomaja vola dački: jana chacieła być pachavanaj pobač z baćkam, va Ušačach. U Izraili chočuć zrabić jaje kremacyju i siudy pryvieźci tolki kapsułu i urnu. Padchavać ich technična praściej, čym padchavać trunu. My havaryli sa skulptaram, z Uładzimiram Niaklajevym na hetu temu, šukali varyjanty, jak heta zrabić.
Kali heta pytańnie nie ŭdasca vyrašyć praz dypłamataŭ, to sapraŭdy pryjdziecca źbirać hrošy na kremacyju, dastaŭku, pachavańnie».
Valancina i Ryhor Baraduliny. Fota z fejsbuka Hleba Łabadzienki.
«Naša Niva» źviazałasia z Ełaj Hareckaj, siabroŭkaj Valanciny Baradulinaj. Akazałasia, što heta jana inicyjavała zbor.
«U suviazi z tym što Valancina straciła dačku, i ŭ jaje ciažki psichałahičny stan, mahčyma, jana pahodzicca lehčy na lačeńnie. My jašče ŭletku prapanoŭvali joj kurs reabilitacyi, ale troški adkłali tady. Napeŭna, heta možna ciapier ździejśnić. Nieabyjakavyja ludzi adhuknulisia i źbirajuć srodki.
Minuły raz, jak sabrali hrošy, my abnavili harderob Valancinie, pryvieźli praduktaŭ. I zaraz kali niešta zrobim, budzie darečna, bo joj vielmi ciažka», — adkazała Eła Hareckaja.
Valancinie Baradulinaj 80 hod. Apošnija hady jana praktyčna nie vychodzić z domu. U jaje siamji zaŭsiody byli niaprostyja adnosiny. Pra heta ŭ svaich uspaminach raskazvali i sama ŭdava paeta, i znajomyja siamji.
Z rodnych u Valanciny Baradulinaj zastałasia ŭnučka Daminika Trućko. Jana z mužam žyvie ŭ Minsku i haduje dzicia.
Adznačym, što ŭ Iłony Baradulinaj zastałasia ŭ Minsku trochpakajovaja kvatera. Jana adydzie svajakam.
«Na fotazdymku toj redki momant, kali ŭsie rodnyja razam: dziadźka Ryhor z žonkaj Valancinaj Michajłaŭnaj, dačkoj Iłonaj i ŭnučkaj Daminikaj», — napisaŭ u fejsbuku Siarhiej Šapran.