Brytanskija kansiervatary na čale z prychilnikam breksitu Borysam Džonsanam pieramahajuć na vybarach — ekzitpoł
Kansiervatyŭnaja partyja na čale z premjer-ministram Borysam Džonsanam pieramahaje na vybarach Pałaty hramad — takija vyniki apytańnia na vychadzie z učastkaŭ dla hałasavańnia, piša bbc.com. Džonsan abiacaje chutka vyvieści krainu ź Jeŭrasajuza.
Zhodna z vynikami vialikaha ŭsiebrytanskaha ekzitpołu, Kansiervatyŭnaja partyja pa vynikach daterminovych vybaraŭ 12 śniežnia atrymaje 368 z 650 miescaŭ u Pałacie hramad.
Hałoŭnyja supierniki kansiervataraŭ, lejbarysty na čale z Džeremi Korbinam, atrymajuć 191 mandat, Libieralna-demakratyčnaja partyja — 13 mandataŭ, Šatłandskaja nacyjanalnaja partyja — 55, Partyja Uelsa — 3, zialonyja — 1. Akramia taho, u parłamient, zhodna z prahnozam, projduć 19 niezaležnych deputataŭ.
Kali aficyjnyja vyniki vybaraŭ supaduć z prahnozam na asnovie ekzitpołu, to kansiervatary, zhodna ź ich prahramaj, nieadkładna ratyfikujuć pahadnieńnie ab vychadzie ź Jeŭrasajuza, i 31 studzienia 2020 hoda Brytanija pakinie ES farmalna, a ŭ kancy hoda, paśla zakančeńnia pierachodnaha pieryjadu — i faktyčna. Tory abiacajuć nie praciahvać pierachodny pieryjad, choć pa damovie ab vychadzie takaja mahčymaść u Brytanii i Jeŭrasajuza jość.
Ekzitpoł — vybaračnaje apytańnie na vychadach z učastkaŭ — praviała sacyjałahičnaja kampanija Ipsos Mori na zamovie viadučych telekampanij Brytanii: Bi-bi-si, ITV i Sky.
Całkam ci amal całkam vyniki vybaraŭ, jak čakajecca, buduć viadomyja prykładna ŭ 9—10 ranicy.
Usie 650 deputataŭ Pałaty hramad u Brytanii abirajucca ŭ adnamandatnych akruhach u adzin tur, i dakładna pradkazać vyniki ŭsich hetych šaści z pałovaj sotniaŭ asobnych hałasavańniaŭ, zdavałasia b, niemahčyma.
Adnak brytanskija sacyjołahi navučylisia davać vielmi blizkija da realnaści prahnozy: jany dakładna pradkazali vyniki parłamienckich vybaraŭ u troch vypadkach z apošnich čatyroch.