Łukašenka aburany: «listy ščaścia» ad DAI atrymlivaŭ praktyčna kožny, chto siadzieŭ za rulom
president.gov.by
Alaksandr Łukašenka pravioŭ siońnia naradu pa pytańniach prymianieńnia mier administracyjnaj adkaznaści, pieradaje BiełTA.
Kiraŭnik dziaržavy adznačyŭ, što hetaja važnaja tema datyčycca i chvaluje ŭsich hramadzian. «Ci ŭ poŭnaj miery ŭ hetaj pracy zabiaśpiečvajecca spraviadlivaść, pra jakuju my časta kažam i jakaja tak zapatrabavana našym nasielnictvam?» — spytaŭ jon.
Pavodle słoŭ kiraŭnika krainy, za dziesiać hadoŭ kolkaść administracyjnych pravaparušeńniaŭ pavialičyłasia amal u dva razy. Pry hetym tolki za niapoŭnyja piać hadoŭ zarehistravana 16 młn parušeńniaŭ, za ździajśnieńnie jakich da adkaznaści pryciahnutyja kala 3,5 młn hramadzian — bolš za 50% usiaho pracazdolnaha nasielnictva.
«Nam treba razabracca, što staić za hetymi źviestkami, i, naturalna, pryniać miery», — padkreśliŭ Alaksandr Łukašenka.
— Miarkuju, tak zvanyja «listy ščaścia» ad DAI choć adnojčy atrymlivaŭ praktyčna kožny, chto siadzieŭ za rulom. Razam z tym fotafiksacyja 7 hadoŭ tamu była ŭviedziena dla taho, kab navieści paradak na darozie. A nie zahnać usich pahałoŭna kiroŭcaŭ u razrad złosnych parušalnikaŭ zakona. Tym bolš što niaredka parušeńni abumoŭleny pierahružanaściu daroh, adsutnaściu dastatkovaj kolkaści parkovačnych miescaŭ i inšymi abjektyŭnymi pryčynami.
«Na čałavieka nielha viešać jarłyk pravaparušalnika ŭ situacyi, kali nie stvorana mahčymaść dla narmalnaha ruchu. Tamu nam treba razhruzić učastki daroh, na jakich fiksujecca najbolšaja kolkaść pravaparušeńniaŭ. Pavialičyć z ulikam realnaj zapatrabavanaści kolkaść parkovačnych miescaŭ, stavić znaki, jakija abmiažoŭvajuć chutkaść ruchu mienavita tam, dzie heta abjektyŭna nieabchodna», — skazaŭ jon.
U suviazi z hetym Alaksandr Łukašenka zaŭvažyŭ, što jamu dakładvajuć pra nievykanańnie raniej dadzienych daručeńniaŭ.
— Heta, Natalla Ivanaŭna (N. I. Kačanava, staršynia Savieta Respubliki), niedapuščalna, kali nie vykonvajucca daručeńni prezidenta. Padnimicie maje daručeńni pa kalcavoj darozie — pieršaj, i druhoj. I praviercie, vykanany jany ci nie. Tam, dzie ja pieramiaščajusia, vykanany. Chutkaść ruchu była pavialičana i hetak dalej. Tam, dzie ja nibyta radziej na kalcavoj darozie byvaju, usio tak i zastałosia. Znajdzicie vinavatych i zvolnicie z zajmanych pasadaŭ, — dadaje sb.by