Prezident Litvy: Rasija ŭsimi siłami sprabuje pierapisać historyju
Fota Nadziei Bužan
«U apošni čas Rasija ŭsimi siłami imkniecca pierapisać historyju. Adzin z takich prykładaŭ — admaŭleńnie ŭpłyvu tajemnych pratakołaŭ Pakta Mołatava—Rybientropa na chvaravituju historyju Jeŭropy», — zajaviŭ Hitanas Naŭsieda ŭ paniadziełak, piša Delfi.lt
Jon nahadaŭ, što 30 hadoŭ tamu, 24 śniežnia 1989 hoda, Źjezd narodnych deputataŭ Savieckaha Sajuza pryznaŭ isnavańnie tajemnych pratakołaŭ Pakta Mołatava—Rybientropa 1939 hoda i abviaściŭ ich niesapraŭdnymi
«Hetyja tajemnyja pahadnieńni nacysckaj Hiermanii i kamunistyčnaha Savieckaha Sajuza vyznačyli paźniej akupacyju Bałtyjskich krain», — skazaŭ prezident.
«Histaryčnaja pamiać abumoŭlivaje ŭsprymańnie budučyni. Davajcie nie budziem zabyvać uroki, jakija my abaviazany vyvučyć pa ŭłasnaj historyi i historyi Jeŭropy. Davajcie nie budziem dapuskać zamieny praŭdy butaforskimi chłuślivymi šyldami», — adznačyŭ jon.
U piatnicu na samicie ŭ Sankt-Pieciarburhu Uładzimir Pucin raskrytykavaŭ niadaŭna pryniatuju Jeŭraparłamientam rezalucyju, jakaja abvinavačvaje SSSR i nacystaŭ u tym, što padpisańnie Pakta Mołatava-Rybientropa ŭ 1939 hodzie spryjała Druhoj suśvietnaj vajnie. Rasijski lidar adznačyŭ, što ŭ SSSR nie było inšaha vyjścia, jak padpisać damovu ź Niamieččynaj, pakolki Zachodnija dziaržavy byli abyjakavyja da prapanovy Maskvy sfarmavać vajenny aljans. «Saviecki Sajuz byŭ apošnim, z tych, chto nie padpisaŭ pakt ab nienapadzie z A. Hitleram», — skazaŭ jon.