Zasnavalnik rytualnaj słužby padaŭ u sud na «Našu Nivu» — i zastaŭsia vinien Redakcyi 500 rubloŭ
U červieni 2019 hoda ŭ paštovych skrynkach minčukoŭ stali źjaŭlacca buklety z prapanovaj dapamohi ŭ arhanizacyi pachavańnia. Pryčym rytualnaja kampanija, jakaja prapanoŭvała svaje pasłuhi, imknułasia mimikryravać pad dziaržaŭnuju arhanizacyju. «Jeŭraradyjo» napisała artykuł pra hetu dziŭnuju źjavu, «Naša Niva» pierastaviła jaho na sajt: «Pachavalnaja» ŭ paštovaj skryni: novy hulec z Rasii zachoplivaje rytualny rynak Minska
Praź niekatory čas zasnavalnik rytualnaj kampanii Jaŭhien Kazłoŭ padaŭ u sud na žurnalistku Maryju Vajtovič, a taksama redakcyi «Jeŭraradyjo» i «Našaj Nivy». Jon mierkavaŭ, što žurnalistka źniasłaviła jaho honar i dziełavuju reputacyju. Siarod prykładaŭ strataŭ jaho honaru byŭ i taki: dyrektar inšaha pachavalnaha biuro nazvaŭ Kazłova hramadzianinam Rasii, a heta, maŭlaŭ, niapraŭda.
U vyniku Jaŭhien Kazłoŭ damoviŭsia z «Jeŭraradyjo» ŭ dasudovym paradku. «Naša Niva» nie pahadziłasia publikavać prabačeńni, tamu sud Maskoŭskaha rajona Minska razhladaŭ pazoŭ tolki suprać našaj redakcyi.
Sud vyrašyŭ, što choć u artykule i zhadvałasia niedakładnaja infarmacyja, jana nie maje nijakaha dačynieńnia da honaru i hodnaści Jaŭhiena Kazłova. Jon abaviazany zapłacić «Našaj Nivie» 500 rubloŭ, patračanyja Redakcyjaj na advakata. Rašeńnie ŭstupiła ŭ zakonnuju siłu.